Amics occitans, la cronica Ribon-Ribanha d’ancuei, titrada « Lo Bauç de Sant Joanet », v’es prepauada da Joan-Pèire BAQUIÉ, president onorari de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc ! »
Lo Bauç de Sant Joanet
A un vintenau de kms de Niça s’atròva Sant Joanet e au sobran dau vilatge lo bauç, la « ròca tant bèla » cantada da Maurís sus d’un tèxte de Choasa Margaritora-Sgaravizzi. Es un luec de caminada estimat sobretot a la prima, quora fa encara frei en montanha. L’endrech que causiguèri per m’anar passejar après doi mes d’embarrament e mi tornar faire una « santat ». Cau dire que la caminada presenta minga dificultat, 400 mètres de denivelat, doi oras e mieja a tres oras per anar-venir.
A Sant Joanet cau laissar la veitura au parc a l’entrada dau vilatge. Pi puar au mai aut dau vilatge e sègre li saetas que menan dau vièlh camin de Sant Joanet a Bezaudun.
Missugas
A la premiera forca, pilhar a seneca lo camin larg, caladat que pua au travèrs de la garriga dont s’atròvan missugas, èuses, caes, arzilacs e ginestieras a l’odor de mèu.
La dràia a serpeja fins au som
A la segonda forca, dont l’i a un panèu que dona la direccion dau « Bauç de la Gauda » (que non cau pilhar) anar a seneca e puar la dràia a seneca que serpeja fins au som.
Arzilacs
Aquí arriberètz a un planistèu e traverserètz un lapier clafit de farígola, de santjoan e de campanulas per arribar fins au taulier d’orientacion.
Farígola florida
La vista es meravilhoa podètz veire au levant Cau Ferrat e au ponent l’Esterèl
