Resson dei imatges dau Blagaire de l’IEO-06 Jan-Jaume de Niça ven de nen mandar la sieu 58ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Lo Cat
Per un còp me sembla fòrça delicat qu’aquest article seigue dedicat, meme dins lo nòstre airau linguistic, nis dau « ca-ga » (1) a n’un cat gaire catolic, manca pas catechisat, per Carema, en la catedrala Santa Catarina que, ben de segur, rana (2).
Meme s’es aquí evocat lo cas d’un caton manca pas tocat per la cataracta, destoscat dins lo catalògue dau sindicat de l’evescat, nos fau restar pès tancats : s’èra un cat-tigre, un cat-fèr, desbarcat d’un catamaran catanés, que fa la catafaleta, la catamiaula, un marrit catiu qu’agantariá d’un còp lei catarinetas, seriá un cataclisme dins lei catacombas de la defunta PACA, una catastròfa per lo ducat (3) !
E, coma per la justicia convocat, son catigòt estent ja ipotecat, trobarà manca pas catòrze ducats traucats per arnescar un avocat aliscat, pescat au cafè « lo Pastrolh », per i faire pagar lo sieu pecat, en plaça dau mercat, lo pauve catonet de Lucàs ( lo catonejant mercant de cataplasmas, criticat per sa practica per lei fabricar emé de cade, d’arnica e de sòcca ) e Rebecà ( jogaritz d’armonica fabricat a Villafranca ), sensa jamai poder replicar o suplicar, ensucat, macat serià estacat sus una cana a pescar … per i fenir secat (4) !
Se lei cataus de Cimié, francs de cativier, ne’n serián esperlecats, lo Menica de Niça Vielha auriá pas mancat, après i aguer soscat, d’èstre pertocat per lo cat rossit e brescat !
1. de nis de « cha-ja », n’en trobarètz a bodre, au nòrd de Dinha e de la cresta de Ventor (5)
2. rena/rana : coma per terralheta/tarralheta, s’ausís a o e segon lei luecs
3. aquò me fai ben mestier qu’aquí la contéa se’n devenguesse un ducat
4. lo cat Nader, lo cat a Lina, bofiga plena, se ten lest se quauquei maufatant i botèt lo fuec
5. sus lei dos pendis de Ventor son pas empachats per congostar, après una astadeta de chachàs cabuçats dau nis, un vielh cachat … e, per tot faire calar, una carrafa de rotge de Chatilhon cachetat …
PS 1: e toteis aquelei cats catalans emmascats per festar lei Ramèus avans Pasca, sota d’un carrobier, emé de galantei chatonas, que dançan : lo cha-cha-cha o la masurca ?
PS 2 : gentei dònas, gentei damisèlas venètz pas me cercar garolha se, aquí, l’ai manca pas evocat lo cas d’una cata o d’una catoneta : totei lei destoscadas, tancadas, desbarcadas, criticadas, ensucadas, secadas, eca … aurián pas fach mestier !
JJ de Niça