Resson dei imatges dau Blagaire de l’IEO-06 Jan-Jaume de Niça ven de nen mandar la sieu 70ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Gelosat, lo nòstre trambalan
Pertocada per un fuble de lanhas e criticas, la companhia de carrèg dei gents, reire felena de la gloriosa P.L.M, urosament defuntada avans qu’una marrida muselieracion la batejèsse P.L.S ( per lo cas, qu’en defòra deis Enaciens, degun saup que la Mediterranèa se trobèsse pas au Nord de Nòstre Dama dau Plomb e dei Brasieras ) decidèt de presentar la sieuna candidatura per lo carrèg « intra muros » dau monde.
Engenhaires, tecnicians, conselhiers de totei menas, despuei lo Presepi fins la Santa Reparata passant per lo Guilanèu (a), Carnaval, lei Ramèus (b), lei cogordons, lei Sants Pèire, Bepe e Tecla, seis aparelhs fotò sus l’emborigol, seis ordinators sus lei genolhs, leis micròs en mans per enregistrar, sei casernets sempre duberts e credons a l’aurilha per lei darniers eroïcs resistents a l’invasion informatica ( fuguèt tot ben fach per aprofichar de l’estagi tant seriós que niçard ) fuguèron barutlats, de jorn coma de nuech, dau Roet fins Pasteur e dau Limpia fins lo Camp d’Aviacion, a passat temps vesin dau camp de corsas …
Tornats au sieu, d’acamp en acamp, de nuechs sensa sòm en jornadas infernalas, de projèct ancian en projèct novèu, d’amelhoraments a cha pauc aponduts, enfantèron ( que Sant Alòi e Sant Cristòu siguesson regraciats ) d’una meravilha, vertadiera capitada que podem, aquí e ancuei, saludar !
PS 1: fau saludar tanben lei coratós « comunicaires » que, maugrat leis òrdres de l’estat majòr, an pas pintat sus lo camion jaune, en demai dau mòt « escorte », lo mòt « girl » per distinguir lo carrèg especialisat dei gentei damas de bòna companhiá … de verai, rarament pimpaduradas ansin, de jaune, emé un flambejant fanau sus la tèsta ; la reina dei rompa-sètis, ela meme, a pas jamai auborat un tau capèu ! A l’ora d’ara, per se garçar d’Euròpa, coma fan sempre, son pas que lei cadieras que nos venon rompre aquelei fans d’englés. Son, totei lei miegjorns picants, lei nòstrei caras … aurilhas ! Pauvrei dròlles … quand se saup monte s’en van nisar, per elei, leis efècts secondaris dei malautiás d’aurilhas …
PS 2 : Molinari se ten lèst per lo cas que seriá demandat per destapar la crosiera …
(a) leis estrenas de l’an novèu son cantadas ansin per Marombrina ( ‘Ribats, ‘ribats )
(b) s’es pas dich se quauqueis estagiaris festejèran Pascas ben avans … la crompa, au Gesù, de palmas trenadas e benesidas
JJ de Niça