Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e cinq ans, lo 8 de junh de 1997. Òsca !
Cronica, dau 2 d’octòbre dau 04 d’avost dau 2022 en lenga nòsta per l’Agachaire
Lo 2 d’octòbre
Probable que o sabètz pas, mai aqueste dos d’octòbre ei la Jornada internacionala de la non-violéncia, coma l’acamp generau de l’ONU ne’n prenguet la decision en 2007.
Aquò pren un relèu especiau aquest an en França, onte la violéncia facha ai fremas tèn una plaça dei grandas dins l’actualitat, e especialament lo bacèu donat un còp a sa frema per un responsable politic important, que ne’n deguet laissar sa plaça e qu’aqueu gèst, dins l’encastre d’un desmaridatge en camin, degun l’oblidarà pas de lòngtemps. Ce que se pòt comprendre quand siatz d’un partit que mete au respiech degut ai fremas autant d’importància.
Vèno d’emplegar lo mot de « bacèu », qu’ei lo promier que me venguet per parlar d’aquel afaire. Mai nòsta lenga n’a pron d’autrei. Se ne’n regardo la premsa en linha, Lo Jornalet o ditz ansin quand escriu de la victima : « Quatennens a reconegut dins un comunicat que li donèt un emplastre ». Lo mot me sembla a ieu un pauc pus fòrt : auriá poscut puslèu li metre de « gautàs ». Ma grand ela auriá pereu parlat de « paume » ò, pus grèu encara, de « carpan ». E, se la scèna èra encar mai violenta, de « revira-mainatge ».
Mai a despart des interessats, degun pòt dire qunte mot ei lo pus just. E, coma que siegue, encuei totes aquelei varietats de bacèus son desenant enebidas. Subretot se fètz de politica…
Jean Yves ROYER
NOS AN ESCRICH :
Jack Sabatier : Tabién per iéu carpan ou baceu!
Joan Pèire : Finda una pasteca !
Jean-Jacques Murat : te mandi un pastisson que de la mitan n’auràs pron …
Jack Sabatier : Ma gran cridava me jamaÏ un carpan !!!!
Pierre Bergounioux : Apr’aicí disèm « un vira-t’enlai » (Causse, Carcin Naut). Bona jornada a totses
Jean-Pascal Goudounesque : Un cofal, subre lo cap.
Claudine Baldayrou Bestieu : Un parelh d’atots.
Jaume PIETRI : Ma maire mi disiá : « totara ti flanqui un bendèu », mai aqueu bendèu venguèt jamai.