Amics occitans, la cronica Ribon-Ribanha d’ancuei, titrada » A prepaus de colís. » es prepauada da Joan Peire BAQUIÉ , president onorari de l’IEO-06. Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc ! »
A prepaus de colís.
Quauqui annadas en arrier, lu colís s’anavan querre a la pòsta dau quartier ò dau vilatge. Era lo mieu cas quora demoravi au quartier Bòn-Viatge de Niça e qu’anavi a la pòsta de Sant Ròc ò ben pus tardi a la pòsta Wilson quora venguèri viure au bolivard Carabacèl.
Tot aquò per dire qu’ancuèi a cambiat, vos empari ren. Lu colís si retiran pas forçament a la pòsta dau quartier. Escotatz puslèu : Un mes fa, deuguèri anar a la pòsta d’en Salèia en vila vièlha per retirar lo mieu colís. La setmana passada, ma frema comandèt de teissut que deuriam anar querre da « Joan dau Tomati », un comestible en la carriera Tonduti de l’Escarea. Pus tardi, un autre paquet en sota-sòl dins un garatge-parc carriera Lamartina, l’i podètz laissar la veitura per quatre centimes d’eurò la minuta. Mas lo pus bèu siguèt ièr dissabta dont doi paquets arribèron lo premier en carriera Gounod, encara un còup da un comestible e lo segond en carriera Pertinax a cò d’un restaurator indian.
Es ensin la mondializacion, Mondial Relay, UPS, e ben d’autres remplaçan per partida lo travalh que d’un temps la pòsta se n’en cargava da soleta.
Tot aquò fa caminar mi dirètz, es ver e avètz rason. Una aplicacion mi permetèt de saupre qu’avii fach lu 10 000 pas jornaliers necessaris per conservar una bòna santat. Aquò permete en mai, de si passejar, telefonet en man, e de descurbir de quartiers desconoissuts de la sieu pròpria vila.
Per de retirats, passar doi oras de temps dins un juec de pista, pòu èstre interessant, mas pensi a toi lu actius que lo sieu temps es comptat e que lo si pòdon pas permetre. Planhi lo temps dont lo postier venia sonar au mieu, escambiar doi mòts denant de mi balhar lo colís asperat. O tempora, o mores !
Joan-Pèire BAQUIÉ lo 12 de febrier dau 2023