Le festival du livre de Mouans-Sartoux : un succès toujours renouvelé
Despí lo 1988, data de la sieu creacion, lo festenau dau libre de Moans-Sartòu a sauput si rendre indispensable en lo paisatge regional e nacional. Aquò èra pas ganhat d’avança estent que denant, la vila de Niça avia provat d’organizar lo sieu. Après quauqu ans, s’èra rota li dents que lu editors nacionals renavan a si desplaçar despí París.
Cen qu’a fach lo festenau dau libre de Moans-Sartòu en mai dei subvencions abituali, que son aquí per ajudar a la sieu perenitat, es la volontat de la comuna de Moans-Sartòu ben segur, mas finda aquela dau monde associatiu, dei sieus estajants qu’an sostengut lo projèct : en tot 260 beninhós (bénévoles). En mai d’aquò li metetz l’acuelh, la convivialitat, la proximitat, l’escota, auretz quauqui claus de la reüssida d’aqueu festenau.
Hommes, femmes en quête de libertés
Lo festenau de Moans-Sartòu son 50 000 visitors, 350 autors, 180 editors, libriers e exposants. Lo tema d’aquest an : » òmes, fremas en quista de libertat » es estat causit da Maria-Loisa GOURDON, ajoncha a la cultura e comisària dau festenau, que s’espliquèt en lenga sus » Vaquí » e diguèt que » la quista dei libertats es acompanhada de la resistança ai diferenti formas de costrenchas, privacions, opressions ; que bofa la dinamica de la vida e la dignitat de la persona umana « . Aqueu tema si declinava au travèrs de la leteratura per adults, aquela de la joinessa, la B.D, la leteratura occitana, l’edicion regionala, l’ecologia, l’edicion associativa, la poèsia… e ne’n passi.
Etre libre de parler sa langue
L’I.E.O-06 foguèt present coma de costuma emb’ai sieus libres e CD. Aquest’an l’associacion presentava lo sieu darnier livre : RESSONS D’AQUÍ, una òbra colectiva, recuelh d’un an de cronicas pareissudi dins « Nice-Matin » edicion Grassa.
L’associacion que festeja lu sieus 30 ans lo 28 d’octòbre èra presenta tanben sus lo pontin dau festenau per respòndre sus « èstre liure de parlar la sieu lenga ». Un debat foguèt menat da Steu LOMBARDO, embé la presença dei edicions còrsi DCL, li edicions « Parole » (Daniel DAUMAS), Serre Editeur (Pascal COLLETTA), IEO-06 (Joan-Pèire BAQUIÉ). Si siam enavisat sus lo còup, qu’aquesta libertat èra relativa estent que li demandas èran exprimadi en francés e que lu interlocutors devion faire un » esfòrç intelectuau » per respòndre en òc. L’esfòrç foguèt fach per au manco la mitan dau monde. Es aquí que si pòu mesurar encara lo camin da faire per socializar la lenga.
