Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e sèt ans, lo 8 de junh de 1997. Òsca !
Cronica dau 8 de setembre de 2024 en lenga nòsta per l’Agachaire
Un anniversari de mai
Despuei lo 14 d’abriu, vos ai plus parlat que d’anniversaris e de tot
ce que podiáu aguer a ne’n dire, en rapòrt ambé la lenga e la cultura
nòsta. Ai començat ambé lei cinquanta ans de la mòrt de Pagnol,
continuat ambé lei sèt sègles dau pus vièlh prèmi literari europenc,
lei Juecs floraus de Tolosa, debanat ambé sa continuacion e sei
Leys d’Amors, e me siáu avisat dau molon de causas qu’avián
grelhat de sa nocion de Gai Saber. Aquí n'ai pas encara acabat
(continuarai après), mai per ara me fau laissar la plaça a una autra
tiera d’anniversaris que deurai ben li consacrar mai d’una cronica :
son aqueles a l’entorn de Frederic Mistral.
N'i a cinc, festejats de totei lei biais possibles desempuei la
començança de l’an, e que o seràn jusqu’a la fin. Dins tot lo païs
d’òc ben entendut, e en Provença mai que mai. N’i a pas mens de
cinc : aqueu de la mòrt dau mèstre, fai cent-dètz ans ; son prèmi
Nobel de literatura, n’i a cent-vint ; la creacion de l’operà de
Gounod « Mireille » ne’n fai cent-seissanta ; cent-setanta ans per la
creacion dau Felibritge ; cent-nonanta-quatre enfin per sa
naissença, en mila-uech-cent trenta. E coma ei lo solet que tomba
just, emai s’acabèsse pas per un desenau, es per aqueste que
començarai. D’abòrd que Mistral naisset un uech de setembre, e
que son anniversari tomba just encuei !
Jean Yves ROYER