Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e sèt ans, lo 8 de junh de 1997. Òsca ! Cronica dau 24 de novembre de 2024 en lenga nòsta per l’Agachaire
Memòris mieus (7)
Tornem ara a Mistral. « Ma proumiero sourtido sus li bras de ma
maire, que de soun la me nourrissié quand, pèr ana à la messo, se
levè de jassino, emai fugue esperdudo dins lou trèu, la revese : elo,
ma pauro maire, dins la bèuta, la poumpo de sa pleno jouinesso,
présentant em’ ourguei soun « rèi» à sis amigo ; e, ceremouniouso,
lis amigo e parènto bèn-astrugant nosto vesito en me pourgènt,
coume se fai eici dins lou bon pople, un parèu d’iòu, un tros de pan,
un grum de sau, uno brouqueto, e me disènt : « Mignot, que
siegues plen coume un iòu, siegues bon coume lou pan, sage
coume la sau, dre coume uno brouqueto. »
Per ieu, l’i aguet ren de tot aquò. Ma maire e mon paire, totei dos a
l’espitau, cadun de son costat, pas question d’una ceremoniá
d’aquela mena, que de tot biais avián passat de mòda. E pasmens,
de present n’i aguet un, emai o sachèsso que despuei quauquei
mes.
Un jorn èro anat charrar ambé la Julieta, una vièlha amiga de ma
familha. Diso pas vièlha per maniera, d’abòrd qu’a 103 ans, coma
doas autrei de ses conoissenças : se fan vièlhas a Forcauquier !
Subran, me venguet : « O sabes benlèu pas, mai quand siás
naissut, siáu anat ofrir un saussissòt a ta grand, que demorava
soleta a ton ostau. Un saussissòt en 1944, èra un present de rèi ! Ta
grand, sas, arrestava plus de me grandmercejar !… »
(De seguir)
Jean Yves ROYER