E aüra qu’avètz ben manjat, ben beugut e m’esperi finda ben escogitat, es vengut lo moment de vi pòrger li solucions ai enquèstas prepauadi a la vòstra sagacitat.
Compliments ai partecipants per li respòstas exacti e mai encara per li respòstas inventadi e li fantasias personali en champostre qu’an donat au juec tot lo sieu suc e n’an permes de s’escracanhar mai d’un còup.
Vi donerem doncas li solucions previsti finda se possedon pas autant d’originalitat quant ai vòstri. Podètz conservar d’a ment li vòstri preferidi.
Vorguessiatz legir premier li enquèstas dau comissari Finòcho : http://ieo06.free.fr/spip.php?article1001
Comissari Finòcho tròba li solucions
Enquèsta 1 : La fèsta espanhòla
Da sempre, lu gestes emb’un ventalh possedon una significacion codificada, son lu antenats dau SMS. La frema a fach saupre a l’òme, son ex-calinhaire, de la laissar en patz en si pauant lo ventalh sus l’aurelha seneca, que n’aima un autre en lo faguent virolar dins la man drecha e qu’aüra es promessa en l’agitant promptament. L’exclús a pas suportat.
Enquèsta 2 : Au circo
La frema èra la partenària dau lançaire de cotèus dau circo. S’èra crompat de cauçuras nòvi mé de talons mai auts que de costuma e lo lançaire l’a chapada en plen.
Enquèsta 3 : Au circo torna
L’òme èra un funambulo dai uelhs bendats e si fidava de la mùsica qu’auria deugut si fermar quora arribava au bot dau fiu. Mas lo cap d’orquestra murtrier l’a fach s’arrestar una segonda tròup lèu.
Enquèsta 4 : L’encrosilhament
Lo baudo en question es un baròme de nèu. Mé lo soleu, s’es delegat, laissant sus plaça lo capèu e un boton.
Enquèsta 5 : Lo contrabandier
L’òme vende de joièus de contrabanda, pi crompa de timbres rares fòrça cars e lu pega sus de lètras de gòi per sortir a la chut-chut lo butin dau país.
Enquèsta 6 : Li torres
Si desvelhant en un quartier desèrt e silenciós per causa de la nèu, l’òme s’es imaginat qu’èra lo darnier survivent d’una catastròfa nucleara, e de desesper, s’es gitat da la fenèstra. Quora a audit lo telefòno sonar, a cridat mas… tròup tardi !
Enquèsta 7 : Lo lume
L’òme èra gardian de semàforo. Sensa lume, una nau a picat còntra lu rocàs e s’es prefondada emb’au sieu centenau de passagiers.
