Eravam mai d’un centenau a visitar Gòrb aquest diménegue 8 de junh. Se la plueia de la nuech avia fach paur a d’unu, es lo soleu que n’a aculhit au vilatge de matin ; lo soleu e la presidenta de Sota Òrme que n’a donat la benvenguda dins un pròpi bèu discors en lenga.
Legir tanben : http://ieo06.free.fr/spip.php?article1123
Cau dire que si son mobilizats lu gorbaïns de Sota l’Òrme. Un dezenau de personas si son transformadi en conferencier(a)s per contar lo sieu vilatge, lo passat, la vida d’un temps mas finda la vida d’ancuei e l’avenir de la lenga. Un travalh dificile per de monde, que de segur, son pas acostumats a parlar dins un micrò davant una fòga que s’empuavan despi la fònt devèrs lo castèu.
L’òrme vielh de 300 ans, li fònts, lo bestiame, lo portau, lo barri, li baumas, li draias, li montanhas, lo micro-climat, lo castèu, la Sant Bartomieu, la glei(s)a, lo traspòrt dei cerieas e autri fruchas, li relacions embé lo vilatge de Pelha, devèrs Menton/Mentan. Tot li es passat. E que energia dins aquesta associacion qu’an la volontat de faire bolegar li cauas.
E parlessiam de l’acuelh dins la sala dei fèstas ! Tot èra lest, li taulas emb’ai taolhas, lo brot de gineste florit sobre, l’aperitiu somost, lu farçums, lu barbas-joan encara cauds, la pissaladiera e la pishada, tot èra a talh.
Lo moment lo mai comovent foguèt lo rescòntre emb’una pichona d’un dezenau d’annadas que m’a dich voler emparar lo gorbaïn. La devem pas deceupre, es per ela e lu joves que lo desiran que devem finda travalhar. Son l’avenir de la lenga.
Merci a Sota Òrme per l’organizacion d’aquesta jornada. Tot èra perfèct.
Lo monde de l’IEO-06 vos an portat un brindi au moment dau past, aqueu de la plueia, normal per un batejar, avètz lo nòstre sosten per cen qu’anatz realizar de bèu per lo vòstre vilatge.
.
Vequi l’adreça de l’associacion Sota Òrme se li volètz escriure ò li mandar de fòtos d’aquesta jornada :
