Lu Rescòntres Occitans en Provença : una bèla capitada.
Lu Rescòntres Occitans en Provença dau 2009 venon de s’acabar. Aquest’an son mai de cent personas que venguèron a Vilanòva de Poligny, cu per la lenga, cu per la dança, cu per lo cant, eca… L’ambient èra calorós, amistós encara mai que de costuma. Lo paisatge, l’environament, li montanhas dau Champsaur son pròpi una meravilha. Aquelu que pilhèron coma ataliers « Environament » ò « Patrimòni » embé Eliana TOURTET siguèron pivelats davant tant de beutat. De lo dire, basta pas, cau anar sus plaça per si rendre còmpte e encara parli pas dau gentum de la populacion locala que saup aculhir coma si deu lo monde que s’interessan au sieu país.
Lu joves dei Rescòntres
Tra lu estagiaris vos parlerai de Pèire un Soíssa amorós de la lenga occitana-provençala que treva despí d’annadas lu Rescòntres e de Patric un american, estudiant de terço cicle que fa una tesa de sòcio-lingüistica sus lo Picard e l’Occitan. Non vos creire qu’aquò es exceptionau, cada annada l’Escòla occitana acuelhe embé plaser de monde que venon au rescòntre de la lenga, coma Luca un jove estudiant esloven ò la japonesa Naoko qu’ensenha aüra la lenga occitana a l’Universitat de Nagoya.
Anna-Maria SGARAVIZZI-GARCIA, Glaudi JUNIOT e Joan-Pèire BAQUIÉ assegurèron la partida lenga. Pedagogia activa e quadre PARLESC (quadre europenc dei lengas) fuguèron utilizats per lo nivèu A1 ; quant a Célina BAQUIÉ es dins lo quadre de l’atalier « mesclum » que nos parlèt leteratura occitana e d’Alan Pelhon en particular.
A l’atalier de cants, Danielle FRANZIN, faguèt estudiar tra autre, li 10 cançons que si canteràn lo 24 d’octòbre a Carcassona, cants repilhats per l’ensems dei estagiaris en fin d’estage au moment de l’aperitiu. Un moment fòrt, que prefigura bessai ben, l’ambient que retroverem lo jorn de la manifestacion.
Danielle Franzin e
Joan-Pèire SPIES, dins lo sieu atalier teatre, metèt en scena « Li minutas radiofoniqui de Francís GAG ». Un gran merci a Françon e Mehelou (pichin nom que ven de Madagascar qu’a per sens aiga doça e sucrada ) per la dicha, l’interpretacion e lo juec de scena.
Jaume COSTA durbèt un grop de travalh sus la « trasmission familiala ». D’estagiaris que trasmeton ò que trasmetèron la lenga venguèron parlar davant lo grop per dire la sieu experiença. Tanben de joves que recebèron la lenga dei sieus parents diguèron lo sieu sentit e viscut. Probable que d’aquesta enquista ne’n sortirà un document ric d’ensenhaments.
L’atalier istòria de Felip MARTEL, coma de costuma interessèt totplen de monde. Si faguèt d’estudis de documents que coma cadun lo saup es lo premier travalh de l’istorian. Felip presentèt tanben en vesprada l’istoric de l’IEO, que s’acabèt per lo diaporama de presentacion de l’IEO-06. Un bèu succès tanben per aquesta serada.
Dau temps de l’estatge, l’escoleta, que s’entreva dei joves, avia per projèct pedagogic lo banh lingüistic dins d’activitats diversi coma de passejadas en montanhas, de cors de danças, la descuberta dau país. De tot aquò n’espeliguèt una peça de teatre creada dai pichoi en occitan. Peça qu’auguèt totplen de succès quora siguèt presentada. Merci ai animators : Celina BAQUIÉ, Emanuela TAFFIN, Mirelha REVERTEGAT e Bregida ROCHE.
4 joves de l’escoleta : Luna, Justine, Léopol, Bertin
Joan-Marc VILANOVA, venguèt finda en vesprada presentar lu còntes de « l’ase e de la cogorda » que n’aviavam ja parlat sus lo site de l’IEO-06.
Dire tot cen que si debanèt ai Rescòntres es impossible, ja que si pòu pas èstre dapertot en toi lu ataliers. Siáu segur que dins lo vòstre ròdol quauqu’un l’i es anat e vos farètz contar. Ieu fa 21 ans que trevi lu Rescòntres e ne’n siáu pas’ncara alassat, alora…
Merci a Jaume COSTA que filmèt l’espectacle de fin d’estatge e que mi mandèt la dicha dau « Bram » :
