Caminada ai Laus dei Milafònts
A 65 qm de Niça, porretz faire una caminada sus una montanha a vacas ò esquasi que presenta minga dificultat, au mitan de prats en flors en aquesta época de l’annada.
Per de caminaires non confirmats que dirai dau « diménegue » aquesta caminada dura tra 3 oras mieja e quatre oras (denembratz pas de comptar en mai lu temps de paua, aqueu dau past,…) . Per lu boai caminaires 3 oras de temps.
Per fins de pas vos perdre auretz menat la carta Michelin n° 195 ò pura la carta guida dau Consèu generau IGN 1/250000 n° 4 valada de’n Vesubia.
Per l’equipament : escarpas de montanha, belicres e pomada per lo solèu, k-wai per la plueia , bachorla d’aiga, e tot lo necesari per d’eventuali bofigas ai pens…
Podetz partir. Direccion Comba de Var en direccion de Dinha. Arribats a la Mescla viratz a drecha per anar en Tinea. Pí 4 qm denant de Sant Sauvator viratz encara a drecha per anar a Val de Blora. Quora auretz despassat Sant Dalmàs, lo darnier dei tres villatges de Val de Blora, dins un viratge en laç, vireretz a seneca sus d’una pista que mena ai laus dei Milafònts. Es indicat mas lo cau pas mancar ! Sus d’aquesta pista enquitranada pueretz una bòna vintena de minutas per rajónher lo valon dau Gasc dont cau parquejar la veitura (balisa 82).
A travèrs la pelosa Aupenca, remonteretz lo valon dau Gasc en direccion dau Col de Velhós (Veillos 2194m) dont troberetz la balisa 83. Aquí la draia si partisse en doi ; seguiretz aqueu de seneca que segue la corba de nivèu fins au laus Pichin (Petit) que pòrta pas ben lo sieu nom vist qu’es lo mai grand dei laus de Milafònts, au pen de la Tèsta dei Margés (2225m). Sus la drecha pilheretz la draia non balisada que pua sobre dau Laus Lòng, dont repilha la draia dau GR 52. Seguissetz sempre aquest itinerari en dominacion dau laus Gròs per arribar lo còl de’n Barn (2452 m). Aquí la vista si duerbe sus l’ensems dau Mercantor e auretz davant l’Argentèrra (3297 m).
Per lo retorn, repilheretz lo GR 52. Au laus Rond, sègre sempre lo GR 52 per rajónher lo còl de Velhós que li siatz ja passat. D’aquí, rajónher la veitura per la mema draia que per anar.