Lo castèu dau « Roccolo »
Lo castèu dau « Roccolo »(1) s’atròva en lo Pimont sus una còla de la comuna de Busca(2). Siguèt bastit en lo 1831 dins l’estil neogotic. Era lo luec de vilagiatura dei marquès Robèrt TAPPARELLI d’AZEGLIO e Constança ALFIERI de SOSTEGNO. Lo nom de la residença ven de « roccoli », rets utilizats per la caça ai aucelons practicada d’un temps sus li còlas de Busca.
D’illustres personatges son passats en aquest castèu : Lord PALMERSON, premier ministre de la regina VICTORIA ; lu princes de Savòia, fius dau rei VICTOR EMANUEU lo segond ; la regina MARGARIDA, molher dau rei d’Itàlia UMBERT lo premier ; l’autor italian Silvio PELLICO.
Lo castèu es constitüit d’un bastiment cental renforçat da doi torres ai merlets gibelins. Sus la façada si pòdon descurbir fenèstras bessoni, rosassis, arcs maurescs e decoracions florali. Au dedintre li salas son pintadi d’afrescs que rapresentan de païsatges manhifics.
Lo parc es un jardin romantic, de draias menan a de baumas escondudi, a de laguets, a d’estàtuas, a de cascadas, a una serra monumentala, a d’aubres exotics coma un sequòia d’Amèrica dau Nòrd e a una capèla non encara restaurada. Da notar la bèla vista sus Busca e lu alentorns despí la terrassa qu’extraplomba la serra monumentala.
Lo castèu si pòu visitar basta li dimenjadas d’après-dinnar. Au mieu avís, es pas pron conoissut dau grand public, eravam basta tres coblas presenti aquest dissabta 18 d’aost. Lo camin de tèrra que l’i mena pòu tanben descorar lo monde. Per ne’n saupre mai sus lo castèu podetz visitar lo site www.marcovaldo.it dau nom de l’associacion que s’entrava de la sieu restauracion despí un dezenau d’annadas.
(1) Roccolo : proparoxiton, prononçar : Ròccolo.
(2) Provincia de Coni.
Joan-Pèire BAQUIÉ lo 23 d’aost dau 2012