Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, l’i a mai de setze ans, lo 8 de junh de 1997. Òsca !
Cronica per aqueu dissabta 19 d’abriu dau 2014
en lenga nòsta
Per l’Agachaire
Sant Expedit
Entre lei sants celebrats encuei, n’ai notat un que ren que son nom sembla una galejada : sant Expedit. E n’i a mai que d’un que penson que o es, naissut d’un marrit juec de mots. I a jusqu’un papa que n’a enebit lo culte… Pasmens ne’n parla lo pus vièlh martirològi crestian, que ne’n fai un legionari roman, martiri descapitat en 303, d’abòrd que voliá pas renonciar a sa novèla religion.
Segon sa legenda, au moment que s’anava convertir au crestianisme, lo diable se manifestet sota la forma d’un cropatàs que li cridava : « Cras ! Cras ! Cras !… » Mots que semblon pron un crit d’aquel aucèu, e qu’en latin vòlon dire « Deman !… ». En entendent aquò, Expedit escrachet lo cropatàs sota lo pè en li respondent « Hodie ! Hodie ! Hodie !… », ce qu’en latin vòu dire « Encuei !… » . Es per aquò que son estatua lo representa lo pus sovent vestit de sordat a la mòda romana, ambé dins la man gaucha la palma dau martiri, lo pè sus un cropatàs en marrida posicion, tenent dins son bèc una benda onte es escrich « Cras », e dins la man drecha una crotz marcada « Hodie ».
Aqueste sant ei fòrça pregat en America dau sud, e mai que mai au Brasil, e pereu a La Reunion. Ei lo patron dau monde qu’an un procès que lei fai esperar, d’aqueles que passon lo permés per menar, emai des escolans…
Jean-Yves ROYER
