Cara amiga, car amic, cars sòcis,
La Cronica Ribon-Ribanha s’arresta ai mes de julhet e aost per repilhar, l’esperam, totjorn mai en camba a la rentrada.
Una 6 ena annada Ribon-Ribanha s’acaba e la Cronica, denant de s’ofrir doi mes de relambi meritat, vos ven saludar e v’augurar de bòni vacanças, per montanha e per val, per caire e per canton, dins lu prats ò sota mar.
S’eravam lançats en aquesta aventura sensa ret, ‘mé de molons de pantais sota lo beret, d’entusiasme e d’esper plen la saca e basta doi-tres tèxtos en lo canton d’un bornigon. L’escomessa èra de talha, s’agissia de desmostrar que cadun, delà dei centres d’interès, dei annadas d’estudi e dau nivèu de lenga, auria un gaubi pròpri per escriure e contar, basta que si mandèsse a l’aiga.
E, non si fenhent cata-chòrnia, lo podèm desvelar aüra, aquesto travalh d’equipa, naissut de la participacion de toi, siguèt un franc succès e ne’n siam immensament orguelhós. Despí lo 2 de novembre dau 2008, data de creacion oficiala de Ribon-Ribanha, augueriam lo plasir de vos prepauar, sensa minga sosta, mai de 250 tèxtos sus de subjècts variats, redijats per mai de 50 autors diferents, d’unu escritors confirmats de talent e d’autres escolans desirós de metre en pràctica lo sieu aprendissatge.
E toi faguèron miranda, jamai lo succès de la Cronica s’es desmentit, n’avèm per pròva la chifra dei lectors setmaniers demorada sempre au dessobre dau centenau per un lectorat total de 25 303 personas.
Tenem a vos remerciar d’aquesta bèla capitada collectiva en esperant que l’an que ven serà encara mai fructuós. Non esitatz de botar sus una fuelha li ideas que vos traversan l’esprit, de bastir dau vòstre biais un racònte dei moments plasents viscuts e finda dei mauparadas que la vida ailàs n’arena. S’auguram de retrovar lu autors d’aquest an que toi n’an encantats mas tanben de descurbir de talents novèus e de vocacions escondudi. Se li vacanças v’adusan l’inspiracion, podètz contunhar de nen mandar li vòstri òbras a l’adreça ja mai que conoissuda : ribonribanha@yahoo.fr, vist que, mentre la Cronica si paua, lu redactors elu atentan de lònga au gran.
Vos demandam de non denembrar finda, quora un article vos plas, que v’a ben divertit ò totplen esmogut, de laissar un pichin messatge a destinacion de l’autor. L’interactivitat es parierament part integrala de la vida e la santat dau nòstre Ribon-Ribanha.
La chorma de Ribon-Ribanha