Amics occitans, la cronica Ribon-Ribanha d’ancuei, titrada « Carta postala de vacanças: La Còrsica », v’es prepauada da Joan-Pèire BAQUIÉ president de l’IEO 06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc ! »
Carta postala de vacanças : La Còrsica.
Partits de Niça lo 12 de julhet a miegjorn e mieg arriberiam a Bastia cinc oras après.
La nau clafida de gents, de veituras e de merç vuèt en miej’ora de temps lo sieu ventre clafit per n’engolir subran pariera quantitat e s’entornar tornarmai a Niça. En tant proveriam de quitar lo pòrt, en direccion dau Sud per la nacionala n°193.
Arribats a FOLELLI laisseriam la plana litorala per s’en puar a PERU-CASEVECCHJE (Pero-Casevecchie) dont n’asperava lo nòstre òste.
PERU-CASEVECCHJE (120 estajants) es una comuna a 450 mètres d’autessa, compauada de doi vilars coma lo ditz lo sieu nom. Fins en lo 1973 siguèt cap luec de canton. Lo vilatge a pauc a pauc s’es despopolat e perdèt la gendarmeria e l’escòla. Au jorn d’ancuei sobre basta la pòsta en tant que servici public.
Lo 14 de julhet sigueriam convidats au manja-drech organizat da la comuna. Rescontreriam lo cònsol que faguèt lu sieus estudis a Niça, lo mieu banquier originari dau vilatge e un niçard embé cu posqueriam escambiar en lenga.
PERU es un vilatge cargat d’isòria. L’i si pòdon veire de bèli bastidas dau sécolo XVIII, coma lo palais de la familha DE CORSI, l’ostau TADDEI que siguèt deputat dau temps dau Reiaume anglo-còrso.
Aquí s’atròva tanben la maion dont naissèt Francesco Ottavio RENUCCI (1767-1842) administrator dau departiment dau GOLO, l’actual departiment de Còrsica-Auta. A PERU podètz tanben visitar la glèia de l’Anonciada embé lo sieu bèu autar en màrmor de Carrara e lu sieus doi cloquiers.
Partent dau vilatge podètz faire de caminadas coma aquela que mena a Velone, vilatge tot encaladat, dont li veituras son fòrabandidi.
Se la fanfara vos pilha de venir en Còrsica venètz faire un giro en aquest luec meravilhós au mitan dei castanhiers : l’i serètz ben aculhits. La mar e li sieu plàias d’arena, a vint minutas dau vilatge, vos duerbon lu braç. Mar, montanha e soleu, que volètz de mai per de vacanças de pantais ?
Joan-Pèire BAQUIÉ
PERU lo 16 de julhet dau 2014