AG de l’IEO-06 a Grassa lo 17 de genoier dau 2015
I – Rapòrt d’activitats de l’annada 2014 presentat per Joan-Pèire BAQUIÉ, President sortent a l’Acampada Generala dau 17 de genoier dau 2015 a Grassa.
Cars amics e sòcis,
Vòli aremerciar de’n premier Dòna Catherine BUTTY, ajoncha de la comuna qu’arepresenta lo cònsol Sénher Jérôme VIAUD. Siam sensibles a la sieu presença e a l’interès que la comuna de Grassa pòrta a la lenga e la cultura occitani. L’aremerciam tanben per lo prèst d’aquesta bèla sala per la tenguda de la nòstra A.G.
Aremercii tanben Anna-Maria POGGIO, qu’arepresenta l’IEO-PACA e toi aquelu que si son desplaçats per l’A.G. qu’es un moment fòrt de la vida de la vòstra associacion.
Vos desiri una pròpi bòna annada. Que l’an novèu sigue portaire d’avançadas per la lenga d’Òc, lo respècte e la promocion dei lengas, la diversitat culturala dins un esperit de convivéncia aquí e dapertot.
A caduna e a cadun d’ajustar lo sieu vam, la sieu vivacitat, per que l’occitan tengue la sieu plaça dins lo grand concèrt planetari.
Que segon la tradicion, l’annada 2015 sigue ben granada e ben acompanhada, per vautres e li vòstri familhas.
Denant que de començar lo rapòrt d’activitats, vòli evocar la despartida de 2 sòcis e amics de l’IEO-06 en l’annada 2014 : Glaudi BELLUCCI (au mes de març) e Joan-Pèire GIRAUT (au mes d’octòbre).
Li nòstri complanchas van ai familhas e a vautres toi que lu avètz conoissuts dins lo quadre dei nòstri activitats : Glaudi que venia au cors de lenga de La Còla, autor-compositor, actor dins la chorma de Barba Zon. Joan-Pèire Giraut, Ancien president de la cambra de mestiers, conselhier Regional, que faguèt mai d’un còup lo viatge embé nautres a Montsegur (camin de la lenga d’òc) e ai manifestacions òc per l’occitan de Carcassona e Besièrs.
Vos demandi una minuta de silenci per onorar lu nòstres amics despareissuts.
Vequí lo rapòrt d’activitats per l’annada 2014.
1° Li jornadas « Descuberta dau País » :
Ne’n fagueriam 4
– Aquest’an li caminadas bailejadi da Joan-Maria ROSSET que nos an permés de descurbir de gents que parlan occitan e lo país alentorn.
Avèm fach la caminada de Còntes lo 6/04 rescòntre de Sénher MARTIN e visita guidada dau musèu de la vila, aquela de Sant Valier de Tièlh lo 11/05 visita guidada embé lo nòstre amic Andrieu SAISSI, aquela de la Gordolasca e de Balver lo 6/07 (visita dau musèu dau lach, de la glèia embé dòna FOURNIER e racòntes da l’amic GRINDA, la caminada de Rocabilhera-Bertemont lo 26/10 (visita de la glèia Sant Miquèu, castanhada e fromai au vièlh vilatge), la caminada de Gordon lo 30 de novembre siguèt anulada en rason dau marrit temps, aremerciam Joan-Maria, Patrícia e Girard per lo travalh de preparacion, avèm l’esper de la poder faire a la prima emb’au retorn de bèu temps.
Aquesti caminadas son l’ocasion de téisser de liames tra sòcis, embé li comunas e lu sieus elegits.
Camin de la lenga d’òc : Aquest an durberiam lo camin de Drap a Pelhon-Vilatge lo 21 de setembre. Mai de 40 personas l’i participèron a la chamada de Marc WALTZER e sigueriam pròpi ben reçauput per la comuna de Pelhon que nos aculhèt emb’una bòna merenda. Per camin si fermeriam a Santa Tecla per visitar lo musèu dau camin de ferre, l’escòla anciana, lo forn comunal e la capèla dei Fraires decorada da Canavesio e Baleison (Mercí Joan-Miquèu RASCHI).
2° Lu ataliers de la seccion :
• [bleu marine]Lu cors de lenga setmaniers : son 7[/bleu marine].
• Lu cors recampan sempre totplen de monde 121 personas marcadi.
Per memòria citerai lo cors de Sant Jaume (20 escolans marcats) aqueu de la Còla (20 escolans marcats), lu 2 de Niça (25 escolans marcats), aqueu de Drap (20 escolans), a Contes (26 escolans), a Saorg (10 escolans). Una capelada ai professors : Françon DALBERA, Jòuseta MAURANÇAI, Guiu RAMI, Frederic MARTRON, Andrieu SAISSI, Joan-Pèire SPIES, Marc WALTZER, Joan-Pèire AIPERTO, Rogier GILLI e Joan-Pèire BAQUIÉ. La demanda es importanta, auriam da besonh d’autres ensenhaires, convidi lo monde de l’IEO-06 a si formar. Siam lèsts a ajudar lu volontaris.
Cors de lenga a Saorge
Cors de lenga a Niça Sant Ròc
• [bleu marine]Lu ataliers de danças populari d’òc [/bleu marine] recampan a Grassa cada 15 jorns toi lu afogats dei baletis (25-30 personas) sota la direccion de Maria Cristina BRAVET e Joan-Pèire CHIAPELLO. Aremercii Maria per lu renduts-còmptes que fa e que permeton una ligason emb’au cors. Aqueu de Niça recampa 20 personas, cada tres setmanas a l’Agora Nica-Est. N’aprofiti per remerciar Choaseta GENTI l’animatritz per lo sieu travalh e lo sieu investiment.
[bleu marine]L’atalier de teatre[/bleu marine] fonccionat fins au mes de junh . Joan-Pèire SPIES que l’avia fach fonccionar 8 ans desirèt si descargar d’aquesta fonccion. Aquest atalier es en cerca d’un animator, una demanda existe, estent que per partida lu sòcis de l’an passat desirerian persègre l’atalier teatre.
[bleu marine]L’atalier de cant[/bleu marine] : foncciona per la sieièna annada, si debana cada 3 setmanas a Niça embé Joan-Pèire AIPERTO. Aquest an l’i siam estats un pauc mai, es a dire un desenau. L’atalier a fach sant miquèu a Sant Ròc, e lo jorn a cambiat (dimècres) l’ambient es calorós e convidam li personas interessadi a l’i participar.
[bleu marine]L’escòla dei campaniers[/bleu marine] : foncciona a Saorge despí setembre 2013 a aculhe 5 a 7 escolans. Joan-Pèire AIPERTO n’es l’animator.
[bleu marine]L’atalier coïna[/bleu marine] : Es una creacion. Foncciona despí la rentrada de setembre embé Crestian DESRUMEAUX, l’atalier s’es ja acampat 3 còups
– en cò de Carlòta lo 25/10 (8 sòcis) per la torta de blea e li panissas
– lo 8/11 en cò de Florença (9 sòcis) per lu barbajoans e lu bescutins ai mortèlas
– Lo 29/11 en cò de Crestian (6 sòcis) per lu macarons au balicò.
Aremerciam Crestian e lu sòcis que meton a disposicion la sieu coïna. Segon lu plats e la dimension dei coïnas dei sòcis, la chifra dei sòcis retenguts per l’atalier cambia. L’atalier a pas vocacion a demorar en la comba de Palhon. Podetz convidar Crestian que vendrà embé plasir a Saorge, Grassa, Bergier, La Còla, … L’atalier si va persègre en lo 2015.
[bleu marine]L’atalier bibliotèca. [/bleu marine]
Es Carlòta RUBINI que s’entreva d’aquò cada dimarç presta de libres ò de CD a toi lu sòcis que lo desiran. A fach la tiera de toi lu libres e CD a disposicion dei sòcis de l’ieo-06. Lu libres si pòdon mandar per pòsta ò per lo biais d’amics que venon ai diferents acamps de l’IEO-06.
Coma lo sabètz la libraria de l’IEO-06 s’es desplaçada despí 2 ans de Grassa a Niça. Lu libres son dins un garatge pròche lo CAL Bòn-Viatge (ven de pilhar per nom Anima’Nice.) Carlòta RUBINI e Jòrgi GHIRARDI s’entrevan dei crompas, de l’estòc e de la venda dei libres. Aremerciam tanben Patrícia FUNGHINI que faguèt lo tablèu Exel embé lo repertòri de toi lu libres. Aquest an la libraria s’es desplaçada :
« Quelle langue parle-t-on à Contes ? » Article sus lo blòg de la comuna de Còntes
– Lo 17/01 per la conferença « Quelle langue parle-t-on à Contes ? »
– Lu 12 e 13/09 a la fiera de Còntes.
– per lo festenau dau libre de Moans (3,4,5 Octòbre dau 2014) Avèm aculhit a l’estand tra autre Loís Pastorelli e Pascal Coletta per lo sieu libre Esba.
– per lo premier mercat leterari de Calènas lo 5/12 au Trident
– dins lu ataliers de lenga de Bòn-Viatge, Sant Ròc e Còntes au moment dei fèstas de fin d’annada.
Avèm vendut totplen de libres e CD en occitan. Fach novèu : d’escòlas e de collèges, nos demandan de libres en lenga (Papagai e d’autres libres).
3° L’ensenhament
Per nautres es un sector clau.
Lo Conselh Academic dei Lengas Regionali s’es acampat lo en lo 2014. Anna-Maria SGARAVIZZI-GARCIA rapresentèt l’IEO-06.
Au nivèu dau primari, la classa bilinga a Niça (Escòla dei Portegaliers) foncciona per la segonda annada. Es Jérémy MARÇAIS que baileja la classa, a 25 escolans de pichina e mejana seccion. Siam dins l’esper de la dubertura d’una segonda classa en setembre de 2015. A la demanda dau magistre d’aquesta classa anèri faire una animacion en lenga lo 11/02.
La seccion 2015 dau CRPE especial Lenga Regionala Occitan dins l’academia de Niça durbèt 3 pòstes per l’occitan-lenga d’òc calia si marcar denant dau 21 d’octòbre. Es lo premier còup qu’acapita e es da signalar. Sabem pas se lu candidats an capitat aquest concors.
Au nivèu dau segondari lu pòstes au Concors annual dau CAPES son passats de 4 a 5.
Li chifras d’aquest ensenhament en lo 2014 (Enquèta DESCO- Ministèri) per l’academia de Niça (06 e 83)
Primari : 3491 ; Collègi : 863 ; Licèu : 543 ; Totau : 4 897
Aquest an avèm dubèrt 3 ataliers setmaniers de lenga en d’escòlas :
– Escòla elementària de l’Aire Saint-Michel e Bòn-Viatge (Marc WALTZER)
– Escòla elementària d’Aubert a Niça (Carlòta RUBINI) sota l’autoritat de la magistra de la classa.
– Per autres l’IEO-06 participèt a 3 jornadas d’animacion « Solidarsport » sus lo respèct per lu pichoi en l’escòla Lepeltier-Les Gerles a la Ternitat (lo 1/04) embé Marido MAIRE, Paula LABATINO e Carlòta RUBINI. (lo 18/06). Una segonda jornada (lo 22/05) embé Paula e Carlòta per li escòlas de Niça-Centre- Parc ESPE (Cessòla). Una terça jornada sus l’ísola Sant Onorat au mes de junh per lu 20 ans de Solidarspòrt. L’IEO-06 siguèt aremerciat per un chèc de 300 € e per un past au Consèu General dont Carlòta rapresentèt l’IEO-06 a la mieu demanda. Mai de 450 pichoi participèron en aquestu ataliers de lenga.
Per acabar, devi apondre que au nivèu dau D.C.L-Occitan (Diplòma de Competença en Lenga), 4 sòcis de l’IEO-06 si presentèron aquest diplòma d’Estat (Alexandra DESMOULINS, Marie-Do MAIRE, Gilles BOLARO, Joan-Loís LEMASSON) e capitèron. Òsca ai quatre sòcis e un gran mercí a Joan-Pèire SPIES que s’encarguèt de la formacion.
Dictada occitana : L’IEO-06 organiza per lo premier còup emb’un collectiu d’associacion la dictada occitana (lo 31/01 a 10 oras au Licèu Massena de Niça. (Per nautres serà lo 9en còup). Si debanerà en 45 vilas de l’espaci occitan e de Catalunha. Vos esperam numerós. (ja 37 personas de l’IEO-06 si son marcadi)
Da signalar que per lo terço còup, l’i serà una dictada a Saorge, aremerciam Joan-Pèire AIPERTO, d’aquesta iniciativa.
L’an passat 52 sòcis faguèron aquesta dictada tra la dictada de Còntes e aquela de Saorge)
Dictada sus lo site de la vila de Còntes : http://ville-contes.net/la-dictada-occitana-de-lieo-06/
Li conferenças :
– Lo 17/01 conferença-diaporama a la mediatèca de Còntes : « Quelle langue parle-t-on à Còntes ? » Animator Joan-Pèire BAQUIÉ.
– Lo 16/04 conferença sus lo flume « Palhon » co-organizada per la mediatèca de Còntes e l’IEO-06. Animator Rogier ROCCA dau « Sourgentin ».
– Lo 5/07 conferença alentorn dau parlar Saorgin en partenariat embé l’associacion I FIORETTI, lo Centre dei Monuments Nacionaus au Monasteri de Saorge. Animator per l’IEO-06 : Joan-Pèire BAQUIÉ (conferença-diaporama).
– Intervista de Miquèl de CARABATTA lo 5/10 per Joan-Pèire BAQUIÉ au café Belle-Lettres au festenau dau libre de Moan-Sartòu a prepaus dau libre « Lo baròco funeral de Paure Mèstre Simon-Pèire Sartre »editat per l’IEO-06.
4° La creacion :
Per la 7ena annada la cronica « Ribon-Ribanha » (fonciona despí lo 2 de novembre dau 2008 ribonribanha@yahoo.fr) persegue lo sieu camin. Es Marc WALTZER qu’a la responsabilitat d’aquesta crònica . Avèm publicat esquasi 300 tèxtos de creacion prepauats da mai de 50 escrivans amators diferents. (5625 visitas en lo 2014, 4 563 visitas en lo 2013).
Mandam una chamada en toi per alimentar la cronica qu’avèm de plus de tèxtos da publicar per lo 2015…
Despí 7 ans Joan-Ives ROYER nos manda la sieu cronica setmaniera de l’agachaire en aupenc. Es una cronica que passa cada diménegue sus lo jornal « La Provence » e tanben sus lo nòstre site ieo-06 lo meme jorn. (4034 en lo 2014, 4 483 visitas en lo 2013)
Lo partenariat embé lo PNR Prealpes d’Azur
Après aver escrich a Marc DAUNIS, senator-cònsol e president dau Parc dei Prealps d’Azur (gaug a la demanda de Maurici CASCIANI) fagueriam lo 14/11 Andrieu SAISSI e ieu la nòstra intrada a un acamp dau PNR a Gileta. De la lenga occitana se n’es gaire parlat. Pasmens lu responsables dau PNR en fin d’acamp nos diguèron que farian apèu a nautres dins l’avenidor, cen que faguèron au principi de l’an. Andrieu SAISSI ven de tradurre en occitan lu titres de 4 librets.
Per informacion, siam marcats en li comissions comunicacion e aquela de la cultura que nos semblan èstre li comissions dont si pòu faire ientrar de lenga en de documents.
Per autre lo PNR a un site e una pàgina FB e faguèron passar l’informacion sus la caminada de Gordon. Nautres li manderiam d’articles dau site sus la caminada de Sant Valiers de Tièlh ò d’autres articles.
Lo PNR ven de nen demandar de travalhar sus d’un quint/cinquen libret.
Presa de paraula de Sénher Marc VIGNAL cònsol de La Pena. A la sieu drecha Sénher Rogier CRESP, cònsol de Greoliera.
La difusion de la produccion occitana :
Coma cada annada es lo festenau dau libre de Moans-Sartòu (lu 3, 4 ,5 d’octòbre) dona l’ocasion d’escambiar emb’au monde que visita lo nòstre estand, de si faire conóisser e de vendre la nòstra produccion. Mas gaug a Carlòta e a Jòrgi avèm multiplicat li jornadas de presentacion dei nòstri libres. Rapòrt a l’an passat avèm mai vendut. Merceji tanben toi aquelu, numerós e volontós, qu’an tengut l’estand au festenau de Moans.
La comunicacion : Per la sièiena annada, l’IEO-06 a publicat un desplegant (400 exemplaris) per faire conóisser li sieu activitats ai particulars e associacions. Es una ajuda precioa l’avèm aremarcat sus l’imatge de marca de la nòstra associacion pròche lo public e lu elegits.
Avèm aprofitat de la sortida dau libre de Miquèl de Carabatta per si faire conóisser pròche lo jornal a gratís LA STRADA (35 000 exemplaris) que faguèt un article e parlèt de l’IEO-06. Nice-Matin parlèt tanben de la caminada de Drap a Pelhon, dei ataliers de Grassa en decembre dau 2014. D’articles son pareissuts sus lo site de la vila de Còntes e de la sieu mediatèca.
5° La vida de la seccion : Eravam 209 en lo 2014, (210 en lo 2013, 215 en lo 2012, 242 en lo 2011, 214 en lo 2010, 199 sòcis en lo 2009, 167 sòcis en lo 2007 e 2008 164 en 2006, 124 en 2005). La chifra esquasi identica a l’an passat.
Si devem pauar la question dau perque toi ensems e veire coma faire societar en lo 2015 e perque societar a l’IEO-06.
Lo C.A s’es acampat 4 còps en lo 2014 : lo jorn de l’AG de l’IEO lo 18/01/14 (a Còntes), lo 1ier /03 (en Bergier), lo 10/05 e lo 18/10 (a Niça). Lo Burèu s’es acampat a Niça lo 08/01/15 per alestir l’AG d’ancuei.
Devi mercejar lu membres dau CA e dau Burèu per la sieu ajuda. Avèm participat tanben a l’A.G. l’IEO-PACA, e a ai CA de l’IEO-PACA a s’Ais. (que si debanan sempre lo dissabta de segur)
Vòli aremerciar tanben lo nòstre clavaire, Maurici CASCIANI, per lo sieu travalh, que si fa dins l’ombra dau sieu libre comptable, un travalh que nos es util e indispensable. L’aremercii tanben per lu sieus dorsiers pròches li diversi collectivitats.
6° Li nòstri relacions emb’ai associacions amigui :
La sinergia tra associacions a encara ben foncionat aquest’an, Alp Harmonia, Sota l’Òrme, la SAHM, lo CCOc País-Nissart e Alpenc… Signali que metèm en rega, sus la telaranha tot cen que tòca a la vida e activitats dei associacions afrairadi.
De tèxtos de Ribon-Ribanha son estats demandats per la SAHM per èstre publicats sus Nice-Matin edicion Mentan ò sus la revista « Ou Païs Mentounasc »
D’autri associacions an pas renovelat l’afrairament (l’Escomessa, Bolega-Bolega, Si Canta si di) e l’aregretam.
7° Lo site de l’IEO-06 sus la telaranha
Despí lo mes de setembre dau 2004, l’ieo-06 a lo sieu site http://ieo06.free.fr/. Siam passats de 492 articles escrichs en 2005 a 2836 en lo 2014. Siam liejuts dins lo monde entier (206 articles, + 28 567 visitas (386 606 visitas), + 49 690 pàginas (726 981 pàginas liejudi)
178 messatges son estats mandats au site en lo 2014 per d’internautes sus lu foroms ò en respòstas a d’articles mes en rega (4232 despí lo principi).
Lo QR-Còde dau site de l’IEO-06
Devi aremerciar tanben Marc WALTZER per la sieu ajuda. Marc que aüra s’entreva per la terça annada de la cronica Ribon-Ribanha lo dimècres e aquela de l’agachaire lo diménegue..
Aquelu que recevon pas’ncara lu articles de l’ieo-06 sus la telaranha si porràn marcar per fin que li mandessiam tota l’actualitat occitana, practicament un article cada jorn.
En lo 2013 aviavam dubèrt una pàgina FaceBook que au jorn d’ancuei recampa 471 « amics » segon l’apelacion consacrada (327 amics en lo 2013).
Vodrii passar la man e trovar quauqu’un que posquèsse mi descargar d’aquest travalh sus lo site IEO-06 e Facebook qu’administri despí mai de 10 ans.
8° Li relacions emb’au monde politic
De mai en mai siam pilhat au seriós per lu politics, quau que sigue lo nivèu : comunau, despartementau, regionau, nacionau. Se si refudam a faire de politica politiciana, siam una associacion curturala, avèm lo dever de faire avançar li idèas curturali de l’IEO. Avèm escrich mai d’un còup ai elegits dau 06 (per exemple au moment dei eleccions municipali per demandar quau èra lo sieu programa per la lenga e la cultura regionali). Aremercii Carlòta RUBINI per toi lu mandadís de letras.
Recevem de subvencions dei comunas de Niça, Grassa, Bergier (Le Rouret), La Còla, Coarasa, qu’aremerciam. Li comunas de Drap, Còntes e Saorge nos prestan de salas per lu cors de lenga. Avèm de subvencions tanben dau CG dau 06 que nos permeton tra autre d’organizar lu R.I.M de Bòn-Viatge . Tot aquò vos serà dich en detalh per lo nòstre clavaire.
Per autre devem dire que l’IEO-06 marca de ponchs dins d’autri intitucions : Siam reçauputs au CRDP (CANOPE) per la presentacion oficiala d’un libre CD (Melodias capturadi) dont, Carlòta e Juliette an participat en prestant la sieu votz. Siam convidats a un past dau Consèu General (Carlòta), siam presents au costat de Solidarsport, avèm despí 3 ans la nòstra plaça sus lo pontin Café Belles Lettres de Moans dont fèm li nòstri intervistas en lenga, siam dins la comission rectorala lenga e cultura regionali, siam associat au projèct dau PNR Prealps-d’Azur. La nòstra politica es de faire ientrar l’IEO-06 e la lenga dins li institucions, sensa faire de politica politiciana.
9° La produccion escricha e orala :
– Avèm ajudat a la parucion de 5 N° de PAPAGAI (n° 145, 147,149, 151, 153) en relacion embé l’IEO-PACA, per la traduccion d’istòrias en occitan-niçard. Lu PAPAGAI son a destinacion d’un public jove. En tant que parents ò nònos avèm lo dever de trasmission de la lenga ai novèli generacions.
D’autres N° son en preparacion per lo 2015.
– Avèm publicat en octòbre lo libre Miquèl de Carabatta) « Lo baròco funeral de Paure Mèstre Simon-Pèire Sartre » es un libre bilingüa occitan-francés (280 pàginas). Lo libre es estat presentat coma ja dich a Moans-Sartòu, au Trident a Niça e lo serà a s’Ais de Provença au mes de febrier lo dimècres 25 au CEP D’ÒC.
– Lo travalh de registrament dei crònicas sus YouTube es en pana esperi que si va persegre en lo 2015. Mas aquò depende per partida dau monde que vòlon registrar de crònicas de Ribon-Ribanha.
– 10° Li fèstas de l’IEO-06
Per memòria citerai :
• Lo 18 de junh a Còntes per festejar la fin d’annada escolaresca.
• Lo 18 de decembre lu sòcis de Grassa e de La Còla si son acampats per lu 13 desserts a Grassa (mai ò mens 40 personas l’i participèron) e lu Reis a La Còla.
• Parier en decembre lu sòcis de Niça, Drap, Còntes an festejat la fin d’annada a Còntes e a Niça.
• Lu 17en RIM de Bòn-Viatge embé lo grope : Bartàs
11° Lu projècts
• Coma l’an passat avèm lo projèct d’ajudar la comuna de Coarasa a revirar lo sieu site oficiau en lenga en fonccion de la demanda per d’articles novèus. Tanben faire de reviradas d’articles per lo jornal municipal de Coarasa « So Portal ».
• De durbir un autre camin per la lenga d’òc. Lo luec es estat causit da Marc WALTZER serà de Pelha a Pelhon.
• De persegre l’ajuda a la revirada d’istòrias per la revista « Papagai » en la sieu version niçarda, provençala e aupenca.
• De persegre lu « RIM de Bòn-Viatge » (18ena edicion) e lu registraments sus YouTube
DU BARTAS ai RIM de Niça Bòn-Viatge
• D’organizar, coma en lo 2014 de caminadas mesadieri (lo premier diménegue dau mes) embé rescòntre d’una persona, d’una comunautat, d’un vilatge.
• De publicar un segond libre dei crònicas setmanieri Ribon-Ribanha.
• De demandar la ceacion d’un Facebook en occitan.
II – Rapòrt Morau
L’annada 2014 siguèt rica d’eveniments. Avèm de mai en mai d’activitats e aquesti activitats respòndon ai tòcas de l’IEO. Li demandas nen venon dei escòlas ( Portegaliers, Aire Sant Miquèu, Aubert, Licèu Tierri Monier, d’associacions coma Solidarsport, de comunas (Niça : lu Mais ; Còntes : conferença Mediatèca, Saorge).
Per créisser mai avèm da besonh dau concors de toti li bòni volontats. Au jorn d’ancuei sembla impossible de faire mai emb’ai nòstri mejans umans.
Avèm da besonh tra autre d’ensenhaires, d’una persona per lo site e la pàgina FaceBook de l’IEO-06 e siam lèsts a ajudar aquelu que lo desiran, a si formar.
La fòrça de l’IEO es d’èstre una associacion pan-occitana.
En lo 2014 avèm travalhat mai embé l’IEO-PACA au nivèu regional ( lu PAPAGAI, participat a la sieu AG e ai C.A.).
De progrès son perceptibles au nivèu de l’ensenhament mas asperam sempre la firma/signatura de la Carta Europenca dei lengas minorizadi.
Demandi en cadun, per lo 2015, de s’engatjar mai dins la vida associativa. Demandam a cada sòci de viure l’occitan au quotidian, de participar ai nòstri activitats, ai nòstri fèstas, de legir lu articles dau site, li nòstri produccions e libres divèrs, a escotar de CD en occitan (li son de ràdios e meme 2 televisions sus lo malhum : òc tele e Té Vé Oc), vos engatgi a anar veire mai d’espectacles en lenga, de faire societar d’amics per participar a l’espandiment de la nòstra associacion. La lenga e la cultura occitani si sauveràn pas se siam flacs, se siam mòls. L’occitan es l’afaire de toi. Cada sòci si deu d’èstre un ambassador de la lenga e de la cultura.
L’annada 2015 serà una annada rica d’eveniments se lo volem toi ensems dins l’unitat.
Lo nòstre moviment culturau a pilhat d’envam, de fòrça.
Per acabar dirai que toti li demandas exprimadi per l’IEO dins lo domani de l’ensenhament, la creacion, lu mèdias e la vida publica an per tòca de crear un contèxto favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani.
La nòstra accion a per amira la preservacion de la diversitat culturala e lingüistica e non pas dau replegament, e demanda lo respècte dei drechs de la lenga occitana per, tra autre, una « lei quadre ». Vos demandi de votar per aquest rapòrt d’activitats e aquest rapòrt morau.
Sabètz bessai que vau laissar la presidença de l’IEO-06 a una persona qu’anam elegir. Denant de passar la man, vòli dire tot lo plasir qu’auguèri de menar l’associacion IEO-06 despi mai de 10 ans. Li cauas devon virar, d’autres devon adurre d’ideas nòvi e explorar de draias novèli.
Vòli aremerciar toi lu sòcis, lu membres dau CA e dau Burèu que m’an sostengut toti aquesti annadas. Vòli dire un grand mercí ai reire-presidents que nos an dubert lo camin : Jòrgi Gibelin, lo president fondator de l’IEO-06 (38 ans en arrier), Gilibèrt Combe, Andrieu SAISSI, Jaume Pietri que m’an format e en cu devi totplen. Desiri la capitada a la novèla persona que pilherà en man lo destin de l’IEO-06.
Vodrii acabar sus d’una frasa d’ Ives ROUQUETTE que defuntèt lo 4 de genoier dau 2015, qu’es da meditar e de faire nòstra :
« L’occitanisme a un gròs defaut, es que cerca una respectabilitat, e se fa fier de ço que crei èsser, çò que li dona sa dignitat.
Sa dignitat son pas lu trobadors, es pas Mistral, la dignitat es la lenga ».
Se mi permetètz encara doi mòts sus lu eveniments dau 7 de genoier e lu jorns d’après, mi ven en ment una sentença de Pablo NERUDA : « Talheràn toti li flors, mas empacheràn pas la prima de venir. »
Grassa lo 17 de genoier dau 2015
Joan-Pèire BAQUIE President sortent de l’IEO-06
Vos presentam la composition dau novèu Burèu de l’IEO-06 :
Vici-President : Marc WALTZER
Clavaire : Maurici CASCIANI
Secretari : Joan-Loís LEMASSON
Segretari-ajonch : Anna-Maria MILARDI
President Onorari : Joan-Pèire BAQUIÉ
Vorguessiatz laissar un messatge en bas d’article vos aremerciam de passar per l’adreça : jpbaquie@yahoo.fr (per rason d’espams avèm deugut barrar lo forom dirèct : répondre à cet article).