Per aquelu que sabon pas cen qu’es lo botis : http://ieo06.free.fr/spip.php?article90
Rescòntre embé Kumiko Nakayama-Geraerts.
Aneriam, Regina e ieu, en dimenjada a París lu 14 e 15 de febrier. N’avèm aprofitat per anar veire una expausicion dedicada au botís provençau. Fins aquí ren que de normal que Regina s’interessa au botís despí d’annadas e qu’es per ela una vertadiera passion.
Doncas aneriam carriera dei « Saints-Pères » dins una pròpi bèla botiga dont rescontreriam la japonesa Kumiko Nakayama-Geraerts que presentava li sieu òbras. La peça mestressa n’èra una rauba de nòvia en botís, teissut de seda.
Kumiko fa de botís despí un vintenau d’annadas, s’es apassionada per aquest art. Fa lo sieu mestier de creatritz tra França e Japon. Publiquèt mai d’un libre sus lo subjèct coma : « L’art du boutis ». Quora a descubert lo botís provençau èra pas simplament la beutat dau travalh alentorn dau teissile que l’a esmouguda, mas li riquessas culturali que l’i son ligadi e que li an dubert la pòrta sus lo passat e lo present. Lo botís perpetua la vida a travèrs lo temps e Kumiko ressente lo sens de la beutat e la riquessa de l’art populari. 
Kumiko serà presenta embé totplen d’autres apassionats, lu 7 e 8 de març a Pèirefuec de Var (Sala Malraux) per lu 10en rescòntres alentorn dau botís, rescòntre organizat per « Lei Roucas dòu Bàrri ».
Per l’i èstre ja anat un còup devi dire que lo monde ven de luenh per veire, agachar, crompar, faire lo sieu mercat : teissuts de tota mena, « quits », fius, agulhas, etc…
Se sentètz nàisser la passion dau botís, non denembratz de vos marcar ai rescòntres occitans en Provença d’Annòt : http://ieo06.free.fr/spip.php?article2829 (contact : pamoc13@gmail.com) . Un atalier bailejat da Regina si debanerà dau divendres 31 de julhet (a 14 oras), dissabte 1, dimenge 2, diluns 3 d’aost (a 14 oras).
A vos veire bessai sigue a Pèirefuec, sigue ai Rescòntres Occitans. Ieu en Annòt l’i serai, non pas per lo botís provençau mas per l’occitan embé totplen d’autres. Alora s’aquò vos ditz…
JPB
Fotòs : Regina
Vorguessiatz laissar un messatge en bas d’article vos aremerciam de passar per l’adreça : jpbaquie@yahoo.fr (per rason d’espams avèm deugut barrar lo forom dirèct : répondre à cet article).