L’anniversari dei 40 ans de l’IEO devia èstre un jorn de fèsta, per si retrovar tra amics. E per nautres, pas de fèsta sensa música !
Lu musicians dau jorn, Nustres, nen siguèron menats da Choasa Genti, que demandèt ai sieus amics d’en Val Varaita, una valada occitana d’Itàlia, de venir a Niça per animar lo balèti.
Lo Val Varaita a gardat la tradicion anciana de li danças populari. Lu ancians an transmes ai joves li melodias pagani. Au jorn d’ancuei, Nustres son animators de li fèstas e dei balètis de la valada e de li valadas vesini.
Doncas augueriam lo plaser d’aculhir Celeste Ruà, Marco Prino e Ottavio Boglione que son « Nustres », acompanhats dau sieu amic musicaire Marco Bailone e, la peça de teatre acabada, lo public cambiava de sala per anar balar.
Lo balèti si debanava a la debuta dins la sala prevista e, davant dau sieu succès, la sala estent de capacitat limitada, lu musicaires de Nustres e lu balaires si desplaçavan sus la plaça Sant Ròc, investissèron lo luec e pilhèron de plaser a acabar lo balèti au calabrun d’aqueu jorn tant doç !
E, de ceucle en corenta, siguèt la fèsta !
Pi lu balaires pilhèron un gostaron e tornèron travessar lo bolivard per asperar lo concert de la fin de serada, dins l’esper de si retrovar dins un balèti novèu…
