AG de l’IEO-06 en Bergier lo 16 de genoier dau 2010

Totplen de monde a L’A.G de l’IEO-06 que si debanèt en la sala dei maridatges de la comuna d’en Bergier (Le ROURET). Per aquelu que posquèron pas l’i si trovar vos presentam lo rapòrt d’activitats e lo rapòrt moral que siguèron presentats per lo president sortent e votats a l’unanimitat. Li eleccions dau Burèu novèu si debaneràn a l’acamp venent de Niça. La data non encara fixada serà mandada d’aquí gaire ai membres dau C.A. Da notar que doi personas novèli entrèron au C.A. : Anna-Maria MILARDI e Marc WALZER.

Da notar la presença de Dòna Cristelle Fini-Louc, ajoncha a la cultura de la comuna d’en Bergier que diguèt dins un pichin discors la jòia e lo plasir de nos veire en aquesta sala comunala e que saludèt lo travalh que fa l’IEO-06 en matèria de toponimia sus la comuna.

I – Rapòrt d’activitats de l’annada 2009 presentat per Joan-Pèire BAQUIÉ, President sortent a l’Acampada Generala dau 16 de genoier dau 2010 en Bergier (Le Rouret)

Cars amics e sòcis,

Vòli aremerciar de’n premier la comuna de’n Bergier, per lo prèst d’aquesta bèla sala per la tenguda de la nòstra A.G.

Aremercii tanben toi aquelu que si son desplaçats per l’A.G. qu’es un moment fòrt de la vida d’una associacion.

V’auguri segon la tradicion « una bòna annada ben granada e ben acompanhada », per vautres e li vòstri familhas. Vequí lo rapòrt d’activitats per l’annada 2009

1° Li jornadas « Descuberta dau País » :

– Lo 14 de junh, avèm participat a la caminada « Caminem per òc » d’Auriveta fins a Rocchetta Nervina (desnivèu + 850m – 800m), la tòca : faire marcar la lenga d’òc au patrimòni mondial de l’umanitat.

– Lo 27 de junh, mai de 100 personas de Sota Òrme e de l’IEO-06 caminèron a Gòrb per faire marcar la lenga d’òc au patrimòni mondial de l’umanitat per l’UNESCO.

– Lo 19 de setembre, avèm organizat una visita en lenga de la vila de Grassa per lu sòcis de l’associacion afrairada Sota Òrme venguts en carri de Gòrb embé mai de 40 sòcis. Lu sòcis grassencs de l’IEO-06 si son mobilizats per faire visitar la Catedrala, la plaça ai Peis, la plaça ai Erbas, la carriera de l’Oratòri, la plaça ai Aires e la Vila Vielha. Si siam retrovats per manjar toi ensems a la sala Sant Jaume. Aremercii toi aquelu que travalhèron a la capitada d’aquesta jornada.

– Lo 20 de setembre, organizeriam la caminada per la lenga d’òc a Coarasa en presença de Mònica Giraud-Lazzari, la cònsola, e d’Inés Cavalcanti de la Chambra d’Òc.

– Lo 24 d’octòbre 84 personas de l’IEO-06 participèron a la manifestacion de Carcassona « Anèm òc » que recampèt 25 000 personas. La tòca : una lei « quadre » per li lengas de França. Lo meme jorn 5 000 bascos èran per carriera a Baiona per li memes rasons. La batesta es pas acabada se volem sauvar l’occitan e li autri lengas de França.

– Lo 25 d’octòbre fagueriam la visita de Narbona. Un viatge meravilhós que devèm tra autres a Evelina MAIOLINO e Maurici CASCIANI que si son entrevats de tota l’organizacion. Vos demandi una picada de mans per elu.

2° Lu ataliers de la seccion :

– Lu cors de lenga setmaniers, Son 5, recampan sempre totplen de monde 93 personas (88 en lo 2008, 75 en 2007, 90 personas en 2006, 73 en 2005, 65 personas en 2004).
Per memòria citerai lo cors de Sant Jaume (20 escolans marcats) aqueu de la Còla (20 escolans marcats), lu 2 de Niça (38 escolans marcats), lo cors de Drap (15 escolans). Una capelada ai professors : Anna-Maria SGARAVIZZI-GARCIA, Frederic MARTRON, Andrieu SAISSI, Joan-Pèire SPIES, lo vòstre servitor e ai escolans fedèls.

La demanda es importanta, auriam da besonh d’autres ensenhaires.

Lo nòstre amic Maurís que bailejava un atalier de « Charaïssa » es anat crear la sieu associacion (D’aquí d’Aià) a Sant Joanet. Estent que l’i èra sempre una demanda per aquest atalier, l’ai remplaçat despí lo mes de setembre.

– Lu ataliers de danças populari d’òc recampan a Grassa cada 15 jorns toi lu afogats dei baletis (25-30 personas) sota la direccion de Choaseta GANDOLPHE e Maria Crestina BRAVET d’una part e Maria-Jousèp CARRERE e Joan-Pèire CHIAPELLO de l’autra, en alternança. Choaseta GANDOLPHE a fach sant miquèu e demanda a èstre remplaçada en junh. L’aremerciam per l’òbra complida.

Aqueu de Niça recampa 22 personas, un còup cada tres setmanas a l’Agora Nica-Est. N’aprofiti per remerciar Choaseta GENTI l’animatritz per lo sieu travalh e lo sieu investiment que pòrta de frucha aquesta annada embé mai de monde..

Per la quarta annada, a Niça un atalier de teatre bailejat da Joan-Pèire SPIES foncciona, recampa 10 personas. L’atalier si debana un còup cada tres setmanas. Per lo darnier cors de l’an nos an organizat un espectacle de qualitat. Siáu totplen content que de joves collegians li fan miranda, coma Juliette e Fabien. Lo 15 de decembre l’atalier teatre faguèt mòstra de tot cen qu’avion emparat au darrier trimestre de l’an.

Teatre : Lo 6 d’abriu avèm aculhit a Niça la tropa de Barba Zon embé Irena Marino, Glaudo Bellucci (sòci de l’ieo-06) e Becho Laura, l’autor de la peça : Pepidon. (50 personas)

L’atalier de cant : foncciona per la segonda annada, si debana cada 3 setmanas a Niça embé Joan-Pèire AIPERTO. (15 personas marcadi). Lo còro a cantat tanben per lo nòstre plasir en decembre. Lo travalh complit en gaire de temps per Joan-Pèire e lu sòcis es remirable.

L’atalier de música foncciona tanben per la segonda annada, juegan lo repertòri tradicionau. Manon e Fanny GENTI bailejan l’atalier, son toi de joves, an creat l’eveniment a Sant Joanet organizant una dimenjada de joves musicians lu 21 e 22 de novembre. L’estatge recampèt 15 joves permetèt de constituir un grop” Banda Balèti” qu’animèt 4 oras de temps un balèti lo 22. Aremerciam l’associacion afrairada “Bolega-Bolega” per lo travalh complit e l’organizacion.

L’atalier bibliotèca. Es Carlòta Rubini que s’entreva d’aquò cada diluns e dimars presta de libres ò de CD ai sòcis que lo desiran. A fach la tiera de toi lu libres e CD a disposicion dei sòcis de l’ieo-06.

Lo bilingüismo en Bergier. Una commission de 6 sòcis s’es creada per metre lo nom dei carrieras en Provençau sus la comuna de’n Bergier (Le Rouret). Avèm lo sosten dau sieu cònsol e dau consèu municipal. La commission s’es ja acampada 3 còups e avèm ja pron ben avançat.

LO GRAMON cèucle locau de l’IEO-06 a Niça :

Coma lo sabètz, LO GRAMON cèucle locau de l’IEO-06 participa tanben a l’organizacion d’un festenau inter-curturau despí 14 ans a l’Agora Nice-Est. Aquesta annada avèm aculhit lo 14 de febrier dau 2009 la companhia Montanaro e Al Maoussilia. Lo 28 de novembre avèm aculhit Hombeline e lo mago d’en Castèu. Au mes de març venent, es un « escop » lo Còr de la Plana.

3° L’ensenhament

Per nautres es un sector clau.

Siam sempre deçauputs per la politica de l’Estat rapòrt a l’ensenhament de l’occitan. Per 33 departiments dau domani occitan, la chifra dei pòstes au CAPES d’Occitan-Lenga d’Oc es de 4, coma l’an passat.

L’acamp au Rectorat sus li lengas regionali, que l’IEO-06 l’i èra convidat, que si devia faire en decembre, es estat remandat au 20 de genoier. Donca per lo moment podem pas vos en dire mai. Mas la situacion sembla blocada que lo rector a ges de mejans suplementari per aquest ensenhament. La venguda de l’Inspector General per li lenga de França, Salles-Lostau, es bessai un esper que la situacion es per evoluir.

Siam sensa nòvas de la Calandreta de Niça, que comunica pas sus la sieu situacion.
Si devem de saludar tanben, la capitada de Laurenç Revest, president dau CCOc País Nissart, que presentèt la sieu tesa « L’occitan alpin, ària d’extension e caracterìsticas linguísticas » a la facultat de Letras de l’Universitat de Niça lo dijòus 17 de decembre, l’IEO-06 èra rapresentat da Anna-Maria Sgaravizzi-Garcia e lo vòstre president.

Mapa dei cors adults d’occitan : L’ieo-06 a realizat doi ans fa, una mapa dei cors de lenga sus l’ensems de l’espaci occitan. Repilha lo document papier « Aprenem l’occitan ! L’occitan, je m’y mets ! » Li son 250 cors sus d’aquesta mapa que s’atròva sus « Google Maps ». La mapa dona lo luec precís dau cors, lo nom de l’animator, lo jorn, l’ora, lo nom de l’associacion organizatritz, lo camin per li anar. Mai de 23 000 personas l’an ja visitada (16 000 l’an passat).

Dictada occitana : L’IEO-06 organiza, per la terça annada, lo 30 de genoier dau 2010 a Niça la dictada occitana que si debanerà en 43 vilas de l’espaci occitan e de Catalunha. Li doi premieri annadas, Miquèu PALLANCA, professor d’occitan-Lenga d’òc e Steve BETTI, conselhier dau rector per li lengas regionali liejèron la dictada tracha d’un tèxto sieu. Li associacions afrairadi de l’Escomessa e dau CCOc-País Nissart, l’organizeràn lo meme jorn a Canas e a Niça. Vos demandam de participar numerós en aquesta dictada que si debana sempre en l’amistat e la convivialitat.

Li conferenças :

– Lo 30 de setembre Felip MARTEL, istorian e cercaire au CNRS venguèt a Grassa per una conferença sus « Mireio » de Frederic MISTRAL.

– lo dimarç 8 de decembre, Denise SANTI venguèt faire una conferença sus li façadas pintadi en lo País-Niçard. (40 personas l’i participèron).

4° La creacion :

Après 156 setmanas de vida lu « Ressons d’Aquí » si son arrestats sus « Nice-Matin » edicion Grassa. Avèm provat de faire viure l’escrich d’una autra maniera sota l’iniciativa d’Anna-Maria MILARDI. Avèm creat sus lo nòstre site la cronica « Ribon-Ribanha » e que fonciona despí lo 2 de novembre dau 2008 (ribonribanha@yahoo.fr). En un an d’existença, de data a data, avèm publicat 46 tèxtos inedits prepauats per 26 escritors diferents, avèm capitat d’interessar 5178 lectors que n’an laissat 259 comentaris en rega. Mandam una chamada a toi lu escritors amators per l’alimentar.

Despí 2 ans Joan-Ives ROYER nen manda la sieu cronica setmaniera de l’agachaire en aupenc. Es una cronica que passa cada dissabta sus lo jornau « La provence » e tanben sus lo nòstre site ieo-06 lo meme jorn. Publicam tanben despí aquest’an, lo diménegue li sieu cronicas anciani.

La difusion de la produccion occitana :

Coma cada annada es lo festenau de Moans-Sartòu au mes d’octòbre que dona l’ocasion la mai grana d’escambiar emb’au monde que visita lo nòstre estand, de si faire conóisser e de vendre la nòstra produccion. Rapòrt a l’an passat avèm un pauc mens vendut. Merceji toi aquelu, numerós e volontós, qu’an tengut l’estand au festenau de Moans. Bessai que cauria faire una comission per la cròmpa de libres novèus, qu’interessan mai lo monde. Aquí tanben es un afaire da segre. Aremerciam Enric BONÉ que s’entreva de la gestion e de l’estòc dei libres.

La comunicacion :

Per la segonda annada, l’IEO-06 a publicat un desplegant per faire conóisser li sieu activitats ai particulars e associacions. Es una ajuda precioa l’avèm aremarcat sus l’imatge de marca de la nòstra associacion pròche lo public e lu elegits.
Avèm publicat tanben embé la comuna de Coarasa un desplegant sus la caminada « Caminem per òc ». L’associacion Sota Òrme si prepaua de faire parier per li caminadas de Gòrb.

Participeriam lo 5 de decembre a la Terça jornada culturala en omenatge a la montanha occitana a la « Província » a Coni. Mai de 200 personas èran presenti. Li autoritats de la Província (un pauc l’equivalent dau Consèu General en cò nòstre) e de la Region Pimont participèron en aquesta jornada. Lo president de l’IEO-06, après un pichin discors sus li accions comuni passadi (Rescòntre dei caminaires a Montsegur, caminadas d’Auriveta San Miquèu e de Coarasa…), balhèt au president de la Chambra d’òc, au nom de la Comuna de Coarasa e de l’IEO-06 un panèu de fusta embé l’inscripcion « Camin de la lenga d’òc ».

En la delegacion per l’IEO-06 l’i èran : Regina BAQUIE, Carlòta RUBINI, Joan-Pèire Aiperto, Joan-Pèire BAQUIE.

Au principi d’aquest an participèri en dirèct a una emission (de 30 minutas) sus radiò-Lengadoc.com (dont presentèri l’IEO-06, per dire cu siam e cen que volem), siguèri tanben intervistat da una jornalista per un N° especial sus la Provença « Destinacion Magazine » (parucion Abriu-Mai) qu’es una revista dau Grop MILAN Presse.

5° La vida de la seccion :

Eravam 199 sòcis a l’IEO-06 en 2009 (167 sòcis en lo 2007 e 2008 164 en 2006, 124 en 2005). La chifra aumenta cada an. Començant d’èstre conoissuts tant au nivèu local coma nacional (A.G de l’IEO a Marselha dont siam estats citats per lo nòstre travalh seriós que comença de pagar)

Lo burèu s’es acampat 5 còps a Niça, Bergier e a Grassa de maniera regulara en mai de l’AG de l’IEO lo 19/01/08, lo 23/02, lo 26/04, lo 28/11. Devi mercejar lu membres dau burèu per la sieu ajuda. E participarem a l’A.G. dau CREO-Provença, au mes de febrier.

6° Li nòstri relacions emb’ai associacions amigui :

La sinergia tra associacions a encara ben foncionat aquest’an, Alp Harmonia, l’Escomessa, lo CCOc-País-Nissart, Sota l’Òrme, la SAHM… Signali que metèm en rega, sus la telaranha tot cen que tòca a la vida e activitats dei associacions afrairadi. La tòca seria tanben de presentar cada associacion dins un desplegant coma aqueu que fagueriam en lo 2008 e 2009 per l’IEO-06.

7° Lo site de l’IEO-06 sus la telaranha

Despí lo mes de novembre dau 2004, l’ieo-06 a lo sieu site http://ieo06.free.fr/. Siam passats de 492 articles escrichs en 2005, a 784 en 2006, 1048 en 2007, 1408 en lo 2008, 1800 en lo 2009. Siam liejuts dins lo monde entier (mai de 242 220 personas, dins un centenau de país, an liejut 470 360 pàginas).

Mai de 2404 messatges son estats mandats per d’internautes sus lu foroms ò en respòstas a d’articles mes en rega.

Devi aremerciar Anna-Maria MILARDI per la sieu ajuda, a ja mes en rega mai de 100 articles. Li demandi de ben voler formar au sieu torn quauqu’un per fin de si partir lo travalh.

Aquelu que recevon pas’ncara lu articles de l’ieo-06 sus la telaranha si porràn marcar per fin que li mandessiam tota l’actualitat occitana, practicament un article cada jorn.

8° Li relacions emb’au monde politic

De mai en mai siam pilhat au seriós per lu politics, quau que sigue lo nivèu : comunau, despartementau, regionau, nacionau. Se si refudam a faire de politica politiciana, siam una associacion curturala, avèm lo dever de faire avançar li idèas curturali de l’IEO. Avèm escrich ai 9 deputats e 4 senators dau despartiment per fin qu’una lei quadre sigue votada per li lengas de França. Serem atentiu en aquò, volèm pas d’una grueia d’òu vueia.

9° Lu projècts

– La sinhaletica bilinga en Bergier (Le Rouret) : lo projèct a ben avançat. Una còla de 5-6 personas s’es acampada de maniera regulara.

– L’animacion de vespradas per de cantaires, contaires, gents de teatre… (coma la venguda dau cantaire Daniel Daumas lo dimarç 19/01 a Niça e lo 20/01 a Grassa)

– La realizacion d’un CD de música tradicionala embé Bolega-bolega e lu joves musicians de Banda Balèti au mes de març.

– Avèm ajudat la comuna de Coarasa a revirar lo sieu site oficiau en lenga e continuam de lo faire en fonccion de la demanda per d’articles novèus. Tanben reviram d’articles per lo jornal municipal de Coarasa « So Portal ».

– L’organizacion en lo 2010 de doi caminadas per ajudar a faire marcar la lenga d’òc au patrimòni mondial de l’umanitat. La tòca es de mediatizar aquesti caminadas que si faràn dapertot sus l’espaci occitan. De faire firmar lo mai possible d’elegits que s’atròvan sus lo percors.

– Esperam tanben d’estampar un an de cronicas « Ribon-Ribanha », en foncion dei nòstri finanças e de subvencions.

– La creacion d’una banca de donadas fotografiqui. Aquesta banca de donadas fotografiqui porria servir ai IEO de la region. Avèm da besonh aquí, d’una persona, interessada per la fotografia e que porria faire de dorsiers tematics au servici dei sites IEO e perque pas de jornaus coma Aquò d’Aquí ò La Setmana.

– La creacion d’un « chat », es a dire d’un malhum social, a l’iniciativa de l’IEO regional. Lo « chat » qu’a per nom « Charrada » http://charrada.ning.com/ permetrà en cadun de parlar, blagar, charrar, galejar… en occitan. Lo monde si porràn, escriure, parlar, veire, metre en rega, d’informacions, de música, de tèxtos, de fòtos, de films, eca … L’avèm provats Pèire Brechet (creator dau site) e ieu (administrator) lo 1ier de genoier e sembla fonccionar. La tòca es de donar un luec novèu per la socializacion de la lenga. Esperem tocar de gents novèus e sobretot de joves. Au jorn d’ancuei 19 personas si son marcadi.

– Lo sostèn au cors de Grassa embé per exemple l’organizacion de conferenças e espectacles coma si fan a Niça. Après Felipe MARTEL, d’autri personas coma, lo contaire-cantaire Danièl DAUMAS, la professora Loïsa Navello-Sgaravizzi, lo cantaire Jan-Nové Mabelly son presentits per venir a Grassa.

– L’organizacion d’un rescòntre « Terinhon en fèsta » en li valadas d’Itàlia au mes de julhet cotria embé l’associacion dei sonaires de campanas dau 06 e la Cevitou.

II – Rapòrt Morau

Coma venètz de l’audir dins lo rapòrt d’activitats, l’annada 2009 foguèt ric d’eveniments, per lo nòstre travalh, li nòstri recèrcas, li nòstri creacions leterari, li nòstri activitats…
Avèm marcat de ponchs pròche lu elegits, que sigon de drecha coma de seneca, travalham embé toi lu democratas. La nòstra soleta politica es aquela de la lenga.
Lo site de l’ieo-06 que contunha d’espantegar li idèas de l’ieo-06 en aquò nòstre e dins lo monde 1800 articles en 62 mes).

L’an 2010 serà l’annada de l’espandiment, si devèm de creísser, lo farem embé judici, emb’ai nòstri possibilitats, lo concors de toti li bòni volontats.

D’unu an ja fach lo pas, aquest an, siatz estats encara mai numerós a pilhar de responsabilitats e a vos engatjar dins la vida de l’associacion. Lu membres dau CA e dau burèu si son desplaçats de maniera regulara ai acamps. Vos remercii d’aquò e vos convidi a faire parier en lo 2010.

A l’ieo-06 avèm da besonh de toi. Cadun li deu trovar la sieu plaça. Demandam a cada sòci de ne’n trovar un novèu e lo faire societar. Es una caua simpla mas que porria participar a l’espandiment de la nòstra associacion.

Lu burèu s’acampa un còup cada doi mes, mas es pas un burèu barrat, basta ne’n faire la demanda e seretz lu benvenguts ai nòstri acamps.

Vodrii aprofitar d’aquest apontament per vos dire que l’axo premier de la nòstra politica curturala per 2010 serà coma l’an passat la trasmission de la lenga e la curtura nòstri :

– Trasmission ben segur emb’ai cors, lu ataliers de danças dont la lenga deurà èstre mai presenta, dins lu ataliers de charaïssa e de teatre, de cant a Niça.
– Trasmission per lo site de l’ieo-06. Podètz mandar ai vòstres amics (-gas) ò collègas lu liames dei articles pareissuts sus lo site que vos an interessats. Es un pichin travalh per cadun mas que pòu menar de monde curiós a la lenga.
– Trasmission ai generacions novèli. Per exemple embé la lectura en familha de libres en lenga ai vòstri pichoi ò felens.
– Trasmission per lu cants que sigon tradicionaus ò de creacion.
– Trasmission e socializacion tanben per lo « chat » (barjacada en occitan)« Charrada ».

Li son mai d’una maniera de trasmetre la lenga e de metre en avant la nòstra occitanitat.
La lenga, aquelu que la sabon, la devon emplegar. Se ne’n devon servir.
Valorizar la diversitat dau monde comença embé la lenga d’òc : lo niçard, lo provençau, l’aupenc per nautres.

En Espanha e en Itàlia la nòstra lenga a un vertadier estatut, lo sabètz. Es reconoissuda coma cò-lenga nacionala, a l’IEO travalham per la sieu reconoissença en cò nòstre, avèm ja capitat de faire metre l’article 75-1 dins la constitucion. Mas aquò basta pas.

Lo nòstre moviment curturau pilha d’envam, de fòrça despí Besièrs e Carcassona 1 e 2. Lo 24 d’octòbre eravam 25 000, per demandar una lei « quadre », per un contengut au desfolopament de l’occitan e dei lengas de França. Se non, serà una rega de mai dins la Constitucion e ren de mai.

Per acabar dirai que toti li demandas exprimadi per l’IEO dins lo domani de l’ensenhament, la creacion, lu mèdias e la vida publica an per tòca de crear un contèxto favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani.
La nòstra accion a per amira la preservacion de la diversitat culturala e lingüistica e demanda lo respècte dei drechs de la lenga occitana.

Vos demandi de votar per aquest rapòrt d’activitats e aquest rapòrt morau.

(Après lo vòte dau rapòrt d’activitats e dau rapòrt morau laisserai la paraula au monde que vòlon nos assabentar de la vida de la sieu associacion, pensi a l’Escomessa, a Sota l’òrme, d’Aquí d’Aià e a d’autres tanben.)

En Bergier lo 16 de genoier dau 2010

Joan-Pèire BAQUIE President sortent de l’IEO-06