Bòna Annada 2012 !

Cars amics e sòcis,

V’auguram una pròpi bòna annada 2012, ben granada e ben acompanhada.

Vos esperam encara mai numerós en lo 2012 a legir lu nòstres articles e a participar ai activitats de l’IEO-06 e aqueli dei associacions afrairadi (qu’arepresentan mai de 2 000 sòcis).

En lo 2011 siguèt una annada d’espandiment de la nòstra seccion embé 7 cors de lenga 2 cors de mai (Contes e Saorg) rapòrt a l’an passat, 2 ataliers de danças tradicionali, un de teatre, de charaïssa, de cant tradicionau, de música, la cronica setmaniera « ribon-ribanha », la biblioteca-cedeteca a Niça, eca…

L’an 2012 anerà encara en lo sens de mai de servici embé la dubertura au public d’un vuechen cors de lenga a Niça. Vos en direm mai d’aqui gaire.

Avèm besonh de toi e v’aperem toi a l’AG dau 21 de genoièr a 9 oras 45, sala de la « Sousta » a Pelhon per ne’n discutre. L’AG es un moment-clau en la vida d’una associacion, e si devem de toi l’i èstre. Un autre apontament/rendètz-vos es previst lo 28/01 embé la dictada occitana au CAL Bòn-Viatge embé Pascal COLETTA que nen farà l’amistat de la sieu presença : http://ieo06.free.fr/spip.php?article2176

Autre apontament mai qu’important, lo passa-carrieras de Tolosa lo 31 de març. Tardatz pas de vos marcar, que l’IEO-06 afita un carri per l’i anar : http://ieo06.free.fr/spip.php?article2164

Aquest an l’AG de l’IEO-Federal que recampa toi lu IEO si debanerà a Niça au CLAJ (avenguda Scuderi) lu 12 e 13 de mai, siatz toi convidats a l’i participar : http://ieo06.free.fr/spip.php?article2156

Comptam sus la vòstra participacion e lo vòstre investiment. Vos demandam tanben de pensar a faire societar d’amics que pensan que desfendre la lenga d’òc e la sieu cultura es aparar la diversitat en lo monde.