Mai de 60 personas caminèron a Gòrb per faire marcar la lenga d’òc au patrimòni mondial de l’umanitat per l’UNESCO.
Per aquelu que son pas’ncara au fiu, vequí un pichin istoric dau projèct :
En lo 2008, l’associacion « Chambra d’òc » que lo sieu seti s’atròva a Dronier (Itàlia) a mandat una chamada per fin que la lenga d’òc sigue marcada per l’UNESCO au Patrimòni Mondial de l’Umanitat.
La tòca : rendre visible aquest gran espaci lingüistic e curtural, que s’atròva sus Itàlia, França e Espanha. Aquest espaci s’espandisse sus 32 departiments de la República francea, 12 valadas alpini dau Pimont, una pichina partida de la Ligúria (Auriveta Sant Miquèu), la comuna de Guardia Piemontese en Calàbria e Val d’Aran en Espanha, embé 13 millions d’estajans ligats per la lenga e la curtura d’òc.
Per aquò faire de monde an caminat de Dronier fins a Vielha, 1300 qm, a travèrs Provença, Cevenas, Lengadòc, en passant per Montsegur.
En lo 2009, le projèct continuèt embé « Caminem per òc », e la creacion d’un malhum de caminadas mai corti sus de draias sonadi d’aüra en avant « Camin de la lenga d’òc ».
Organizadi sota lo capèu de la « Chambra d’òc », aquesti caminadas son sostengudi da l’IEO-06 que a pilhat lenga embé mai d’una comuna. Ièr èra Gòrb, comuna dau País Mentonasc qu’organizava la caminada emb’au sosten de l’Associacion « Sota Òrme », dau Cònsol M. ISNARD e dau consèu municipal qu’aremerciam aquí.
Aculhits per la presidenta de Sota Òrme : Arleta PASTOR, lo monde comencèron a arrivar a comptar de 8 oras de matin.
Caminem per òc a Gòrb (2)
Darrier Arleta PASTOR, li 9 placas que seràn messi sus li doi draias de Gorb.
Caminem per òc a Gòrb (3)
Joan-Pèire AIPERTO fixa la premiera placa dau « CAMIN D’A LENGA D’ÒC ».
Caminem per òc a Gòrb (4)
Lu caminaires s’endraian per 3 oras de caminada…
Caminem per òc a Gòrb (5)
Après lo betum, un camin encaladat de tota beutat.
Caminem per òc a Gòrb (6)
La draia aüra passa au mitan de la ginestiera. Lo sentètz l’esperfum ?
Caminem per òc a Gòrb (7)
Siam sota Mont Agel, Gòrb es davau ben pichin.
Caminem per òc a Gòrb (8)
« Lucie » e « Myrtille » acuelhon Juliette e Fabien au Prat Gran dont lo monde van manjar.
Caminem per òc a Gòrb (9)
Caminaires e organizators ataulats ensems partisson lo sieu past.
Atestacion de caminada a Gòrb
Coma de costuma lo monde de Gòrb an sauput organizar li cauas. Cada còup que l’IEO-06 si desplaça en aquest vilatge, l’acuelh es dei mai simpatics, la convivialitat dei mai grani. Que ne’n sigon toi aremerciats.
