1- Que de nòu ?
2- Coma lo diètz en niçard ? Depuis qu’il l’a traité de gringalet, il s’est fait prendre en haine.
3- Pichina dictada
4 – Contatz « La fèsta ! »
1- Que de nòu ?
Choaseta: La tórdola.
Que de nòu : La tòrdola.
Lo nòstre barcon es totplen florit. Dins li jardinieras agrapats a la balustrada, l’son dei geranioms roses et roges, dei pensèias blus, jauni e blanqui, dei gauches jaunes e oranges mas tanben de majofiers que venion dau nòstre jardin de Valdeblore quora avème fach sant Miquèu.
Li tòrdolas aiman totplen picassar la tèrra dins aquesti jardinieras, Despi doi jorns, una tòrdola a fach lo sieu nido dins lei penséias. De fes, es lo cobla que ven pitassar e lei escassam, mas embé la tòrdola que coa, lu laissam faire, es totplen bèu a veire e rar.
Dissatba au sera, la tòrdola a post un òu tot blanc, pi es partida. Diménegue es revenguda en lo sieu nido per coar. Diluns, ela a post un segond òu. Lo mascle e la femèu venion coar a torn a torn.
Gerald es anat en cò de Flot dins la vila vièlha per crompar de granas per li donar da manjar.
Jennifer : Ai escrich l’anecdòta d’una magistressa sus la venguda de Djé Balèti a l’escòla dei Portegaliers.
E vi vòli cuntar aqueu bèu moment. Ai descubert una videò sus internet que si sòna « conférence cougourdounesque ». En aquesta videò, Jérémy Couraut (Djé Balèti) e Jérôme Désigaud parlan dei cogordons e coma si fa un instrument de música emb’un cogordon.
Alora ai mandat un corriel a Djé Balèti per li demandar de venir a l’escòla.
Avèm preparat un pichin espectacle per Djé Balèti e ai ensenhat ai pichoi lu noms dei instruments de música. Avèm vist lo dessenh de Mossa e la fotò de l’orquestra Vèspa.
Avèm sentit la cançon « la natura » de Djé Balèti e la cançon « Adieu paure Carneval » per escotar li vèspas. Lu mieus escolans son verament pichins sobretot aquelu qu’an solament tres ans mas an capit tot, e èran pròpi contents d’aqueu projèct.
Quora Djé Balèti a fach la demostracion dau petador, toi lu pichoi èran urós e si son fachs una forra de rire. A finda fach veire ai pichoi l’espina e lo mirliton. E pi après, avèm lavat e ponçat lu cogordons en la pichina cort a costat de la classa. Era un moment de conviviença embé lu pichoi, l’artista mas finda embé lu paires, li maires e li maigrans que son venguts per m’ajudar. Lo lendeman avèm mes de lentilhas dintre lu cogordons talhats e curats per faire de maracàs. Lu escolans si sovendràn lontemps d’aquest projèct.
JPB : Passejada a bicicleta :
Dissabta de matin aprofitèriam, Regina e ieu dau bèu temps per sortir li bicicletas. Faía totplen de temps qu’èran demoradi au garatge de l’immòble e ieu sensa faire d’espòrt.
Doncas siam partits despí lo nòstre en direccion de la passejada dei inglés, pi dirreccion Vilanòva de Lobet fins au pòrt dei Marinas.
De retorn si siam arrestats en riba de mar, a Canha de Mar, per una pichina manjuca sus d’una terrassa en riba de mar. En totalitat 31 kms e lo chícol, es pas gran caua mi dirètz mas per una premiera sortida ne’n siáu content. Lo còup venent esperi d’anar fins a Antíbol e anar manjar en la vila vièlha dont l’i a lo mercat. Despí lo pòrt, quora lo temps lo permete, si pòdon veire toti li montanhas dau Mercantor. L’i son de bèli fòtos da faire.
QUIQUÍ : Es la darniera setmana que fèm la cura de santat a Bertemont lu Banhs ! Que plasir de si faire coconar, sobretot da lo quine que nos fa de massatges sota d’aiga que cala en pluèia sus de l’esquina. Es un vertadier benèstre ! Aquest quine si sòna Atila mas a ren da veire embé lo cap dei Uns !
Li personas que s’ocupan de nautres nos fan totjorn cent bòni manieras : totjorn un mòt gentil, un soguinhe, son prevenient e semblan aver minga problèma epura per elu la vida es pas forçament simpla coma per tot lo monde. Pensi que farem una autra cura l’an que ven perqué fa de ben !!!
2- Coma lo diètz en niçard ? Depuis qu’il l’a traité de gringalet, il s’est fait prendre en haine. Despí que l’a tractat de squirincho, s’es fach pilhar en òdi.
3- Pichina dictada
« Sus la tèrra embriagada de sang
Siam aquí cada jorn a si roïar lo fetge
e córrer darrier un pantais onch batejat bònur
un jorn coma un autre siam entrats dins lo círcol
per balar fins a la darriera cançon dei campanas
Degun ditz jamai ren
siam totjorn solets a sublar la cançon de la pena. » Alan Pelhon in « Coma una música » Z éditions (1989)
4 – Contatz « La fèsta ! »
Gerald : La Fèsta
Per anonçar un eveniment particular « faire la fèsta » si ditz de numeroï manieras :
– Faire la fiera
– Faire la bomba
– Faire la vida
– Faire la noça
– Faire l’anniversari
– Faire la fèsta de la musica et d’autri….
A Niça, lu 4 e 5 de Junh, èra la fèsta dau comerci embé pas mens de 150 animacions per li associacions dei comerçants dins lo centre de la vila.
Lo cònsol avia parlat dau sieu plan de deconfinament dau 12 de mai. Lo monde artistic èra convocat per aquest esprit festiu embé d’espectacles de deambulacion en jugant de jazz, de la música d’aquí, una avant-premiera de la fèsta de la música dau 21 de junh.
Lu comerçants an fach dei braderias devant lo sieu masaguin.
Lo campionat dau monde de pan bagnat èra organisat carriera dau mercat. Toi lu beneficis seràn reversat a l’espitau Lenval per lu enfants malauts.
Marie-Do : La Fèsta
Aüra la fèsta per ieu es un moment de convivialitat que passam en familha ò embé lu amics. Per la fèsta dei maires diménegue passat, li mieu sòrres, neps ,pichins neps, ma filha e li mieu felenas si siam retrovats per manjar de saucissas ròstidi e beure un pauc de « champagne ». Lo ‘près-dinnar jugueriam au « Taboo » : cau faire devinar un mòt a la sieu equipa sensa emplegar de mòts proïbits. Si siam ben riuts. Una bòna jornada !!
Dins la tradicion de la nòstra familha la fèsta s’augurava lo sera denant la jornada dau Sant, èra mai importanta que lo natalici. Mi remembri au mes de novembre la fèsta de mon barba que si sonava « Leon », ma maire faía de binhetas au pons, tota la familha venia a maion embé de tartas, de pastissons. Cantavam, lu enfants recitavan de poèmas emparats a l’escòla. Lu vièlhs parlavan niçard, son plus aquí aüra e tot aquó es perdut.
QUIQUÍ : La fèsta !!
Per ieu la fèsta es totjorn un bèu moment de convivialitat quora siam toi ensems embé la familha o, e embé d’amics per festejar un eveniment : una fèsta, un natalici, un anniversari ….mas es tanben la sorpresa de quauqu’un que sòna a la pòrta e quavii pas vist despí de temps !
La fèsta pòu èstre toi lu jorns quora duerbi la fenèstra e que lo cel es blu, que lu aucèus cantan e que mi dii que la vida maugrat lu problèmas es bèla e que la cau pilhar a bèli dents.
La fèsta es la naissança d’un pichon ò pichona,
La fèsta es lo soguinhe d’un paure qu’a lu uelhs que brilan quora vos avia dich un mòt e li avètz donat quaques pitòls.
Cada jorn pòu èstre una fèsta mas cau veire la vida dau bòn costat !!! Cau faire que la vida sigue doça mas cau pas oblidar qu’a costat d’aquò la misèria, la malautia e totplen de maganhas l’i son tanben !!!
Dimarç que ven farem fèsta embé lu sòcis dau cors e serà mi pensi un moment de jòia, de plasir de si veire enfin e de si retrovar toi ensems.
Crestiana : Lo festin
Au vilatge, l’ estiu cad’an (denant de l’embarrament), es “lo festin”, qu’aüra lo sònan » le festival d’été » !
Quora èri jove èri au comitat dei fèstas e lo festin èra un istòria d’una setmana. Ancuei lu jovents pagan un orquèstra que ven emb’ un camion e que fa tant de bosin que non si podem manco parlar.
Au principi lu abats fan la chamada, es a dire que lo jovent parla a la larga e sòna cada familha. La chorma juega un pauc de música mentre que si devon cambiar li gijòlas còntre una bòna man.
Pi, es vito l’ora de la messa e aquest jorn la glèia es plena e lu elegits (quora l’i venon) si meton ben davant coma se l’i èran acostumats.
A la sortida de la messa, avèm lu onors ai mòrts davant lo monument e lu discors que si languisson…
L’aperitiu que segue fa pilhar en passiença tot aqueu temps.
L’après-dinnar lu pichins fan de juecs mentre lu adults fan un concors de bòchas.
La nuech venguda, es lo principi dau balèti sus la plaça vesina, emb’un bacan que mi fa tremolar lo luquet de la coïna !
Da pichina asperavi lo festin perqué èri vestida de nòu e èra pròpi la fèsta, mas ancuei asperi que sigue passat !
Festin en lo 1970
Festival en lo 2020
JPB : En lo 2016 l’IEO-06 festejava lu sieu 40 ans
Au mes de novembre dau 2016 l’IEO-06 festejava lu sieus 40 ans a l’Espace Laure Ecard a Niça Sant Ròc, dins tot l’espaci d’entrada d’aqueu bèu luec, si faguèt mòstra.
D’un costat, siguèron lu panèus que presentavan li activitats de l’associacion, mé totplen de fòtos, de documents, d’articles de pressa, de tèxtes…
Siguèron alestits la presentacion dei cors, dei caminadas, de l’escòla dei campanas, de la mapa d’Occitània mé li seccions de l’IEO, dau site e dei 3 pàginas Facebook, dei manifestacions, lo forum d’òc, l’edicion de libres, … que mostrèron la riquessa de la vida de l’associacion, e lu partenariats que menam mé d’autri associacions e d’institucions…
De l’autre caire de l’espaci, d’artistas que travalhèron embé l’IEO-06 faguèron expausicion de quauqui òbras :
Ensinda, Verònica CHAMPOLLION presentèt de fòtos dau sieu cavau de carta pista que la sieu reproduccion illustrèt la cuberta dau nòstre darrier libres de crònicas de Ribon-Ribanha, LO RETORN (2016, IEO-06 edicions) ; Arleta PASTOR faguèt mòstra de dessenhs que realizèt per illustrar lo RIBON-RIBANHA, CRÒNICAS D’ANCUEI PER DEMAN, (2012, IEO-06 edicions) e per lo libre de Joan-Glaudi PUECH, UNA PÈIRA E UN TAMBORIN (2013, CREO edicion) ; faguèt mòstra finda de tablèus.
Per acabar la nòstra jornada de fèsta, Alidé SANS nos faguèt un concert dei grands e l’i siguèt un balèti sus la plaça Sant Ròc.
