Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, l’i a mai de setze ans, lo 8 de junh de 1997. Òsca !
Chronique pour ce samedi 08 juin 2013
en lenga nòsta
Per l’Agachaire
Sant Medard
E bè non : es pas de plueia que vos vau parlar encuei !
D’abòrd qu’aquest an n’avèm pron charrat coma aquò.
E pereu qu’ai agut fach dos còps aquesta cronica un 8 de junh sus aqueu tèma (en 2003, emai en 1997 qu’èra just mon promier papier dins vòste jornau…)
Pasmens, ei ben dau pus conoissut dei sants dau jorn que vos vau parlar.
Que de tot segur, se sabètz de provèrbis a citar per la Sant Medard, m’estonariá que sachessiatz quauqua ren sus lo personatge…
Que siegue mòrt un 8 de junh (en 545) estonarà degun, qu’autrament seriá pas lo jorn de sa fèsta.
Mai fuguèt d’abòrd renomat per sa generositat, que de pichòt dejà lo fava arremarcar.
Es ansin qu’un jorn que son paire li aviá fach gardar sei chivaus, ne’n donet un a un paure que veniá de crebar lo sieu au travalh, e qu’aviá pas pron de sòus per ne’n crompar un autre.
Cresètz benlèu que son paire lo cridet puei ? Jamai de la vida ! Quand eu tornet comptar sei bèstias lo sera, lo còmpte èra bòn, que pas gis ne’n mancava…
Sembla ben que, en mai dau bòn Dieu, siegue estat pron collèga ambé lei bèstias justament.
D’abòrd que, pus pichòt encara, un jorn de plueia que riscava de se prendre una raissa, una aigla venguet li n’aparar…
Fuguèt aquò son promier rapòrt ambé la plueia mai, coma sabètz, èra pas lo darrier…
Jean-Yves ROYER
