Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups.
Per informacion, aquesta cronica comencèt, l’i a mai de dètz-e-sèt ans, lo 8 de junh de 1997. Òsca !
Cronica per aqueu dimènegue 30 de novembre dau 2014 en lenga nòsta
Per l’Agachaire
Sant Andrieu
Dau sant dau jorn, tot ce qu’ai retengut de mei leiçons de catechisme, es qu’èra estat crucificat sus una crotz pron originala, en forma de X. Ai puei agut remarcat tot plen de representacions de son martiri dins l’istòria de l’art, e sachut pus tard qu’aquela aisina aviá d’autres utilisacions pas tant catolicas, sensa comptar tot dispositiu que pren aquela forma…
Ara que siáu grandet, ai cercat a ne’n sacher un pauc mai, e n’ai aprés qu’aviam gis de testimòni ancian d’una tala practica, que de tot biais l’òm vei gaire son utilitat, de qunte ponch de vista que siegue. Alevat bensai en sadisme, que l’imaginacion li fai pas gaire fauta, mai bota, d’aquò nimai les ancians n’an pas parlat…
En furnent sus la Tela, ai trobat que seriá una invencion naissuda au sègle X, que me siáu demandat d’intrada s’èra pas una galejada, vista la forma d’aqueu nombre en chifra romana, qu’es ela que s’utilisa per comptar lei sègles…
Mai perqué anar li inventar una crotz tant curiosa ? Sembla que siegue en rapòrt ambé lo crucificament de son fraire, Pèire, que l’an imaginat crucificat la tèsta en bas. Per umilitat, a sa demanda, me disián de pichòt. Per lo far patir encar mai segon d’autres, pareis. Adonc, per eu, se volián que se remarquèsse sus una crotz, sensa imitar ni lo Crist nimai son fraire, faliá ben trobar una solucion…
Jean-Yves ROYER
