Resson dei imatges dau Blagaire de l’IEO-06 Jan-Jaume de Niça ven de nen mandar la sieu 50ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Miracle pascau
Coma lei sieus gardacòrs, vestits multicolòrs, cascos beluguejants, alabardas lusentas, an noms d’ostau Lindt, Milka e autrei Suchard, paire, fiu e … felèn, convèncuts de prendre per de paurei campanas asclatadas (1) lei bregands curamalas de totei menas e meme lei gabelaires furnaires, lo clavaire sarra-dardenas dau Sant Sèti aviá fach pacha emé la STEF per assajar de faire passar leis Aups, sensa lo mendre auvari, ai sieus maigres picalhons, fruchs d’una vida romana de pauretat e d’umilitat.
Aqueu transferiment inaugurau fuguèt una franca capitada : la redobtabla eficacitat dau camion frigorific de la famosa companhiá d’entrepausatge e de carreg aviá fòrça ben empachat lo chicolat de fondre !
Despuei que la revista « lei lengas de Serp e de Sogra dei Ponchetas » ne’n faguèt lo racònte, aitant fidèu que sincèr, totei lei confiseires de Niça Vielha son a l’espèra atentiva dei resultats oficiaus deis assais de transferiments dau meme, emé de galinas, lapins ò sant pèires de chicolat. Se marmoteja sus lo mercat dau cors, a sota votz, que lei cameràs municipalas an destoscat, dins quauquei reire-botigas de Peiroliera coma dau Mascoina, farcits dau meme … cebas, cogordetas, pebrons, tartiflas, tomatis (2).
Esperam totei que Crestian metra lèu, lèu, aquelei recèptas, sus lo nòstre site …
1. aquelei campanas an ren de veire emé aquelei tornant de Roma per leis ers ( per, de segur, esparnhar la quista ai peatges ) una dimenjada primadiera au barutlage rotier, dei bisons pas gaire finochós, subrecargat ;
2. se ditz tanben que lei pastissiers d’en plaças d’Armas e Arson se tenon lèsts per un tau farciment dei bòchas, meme aquelei dei contrarotlaires dei platanas …
PS : pareis que se son mes candidats fornissaires dau farçum, lei jogaires de pilos ; una vertadiera escomessa per arribar de faire passar sota lei pòrges de seguretat, sensa lei faire campanejar, d’uòus d’estruci … preferits en aquelei de calha …
JJ de Niça