Resson dei imatges dau Blagaire de l’IEO-06 Jan-Jaume de Niça ven de nen mandar la sieu 52ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Veritat enfin !
Mai en cu faire fisança ? Istorian, linguïsta, etnològ, paleografe, arqueològ, paleontològ, zoologista ? Toteis aquelei saberuts son d’acòrdi per afiermar solemnament qu’en riba dau pòrt vièlh de Marselha, coma lo canebe i creissiá e i fuguèt trissat, es d’eu que lo nom dau luec, la Canebiera, s’en ven.
Pasmens avèm aquí l’irrefutabla pròva que lo nom de l’avenguda coneiguda dau monde entier a ren de veire emé lo canebe ; ven tot simplament de l’engenh especiau per pescar: la cana-a-bièrra, tè !
NB :
– lei quauquei rares cadabres de Bellet pescats, per azard, que veisem aquí, demonstran l’onestetat dau fotografe ;
– lo pescaire, cercaire de la facultat de litres d’aiga fosca dau Palhon Escarenenc, a vògut tenir secrèts lei mènas de bromeg, d’esca e musclau emplegats aquí ;
– lo mistèri demora entier : monte aquelei peis blancs de toteis especias, escarpas, gòbis, sòfias, trochas, s’escondon per festejar de lònga, sensa vergonha, sensa lo mendre socit dau reciclatge, lo Sant Patric ?
PS : son de marridas lengas que dison qu’aquesta cana-a-bièrra es emplegada, emé fòrça capitada tanben, per campanhas, bartàs, bòscs, còlas e valons, per de vertadiers amorós protectors de la natura … tancats a l’agachon … t’agatan meme, emé aquest engenh, boitas de pastís ò de sardinas, paquets de cigaretas vueges e autrei megòts …
JJ de Niça