Una setmana après la despartida dau nòstre amic Joan SAUBREMENT nos arribèt, da Miquèu PALLANCA, la nòva de la despartida de Joan-Pèire BELMON que defuntèt divendres 25 de setembre.
Joan-Pèire èra conoissut dau grand public de per l’emission VAQUI qu’animèt e que n’èra lo productor fins a gaire. Animèt tanben a France Bleu Vauclusa l’emission Escapadas remessa en causa per la direccion d’aquesta Ràdio. Aviavam luchat toi ensems per la conservar.
Mas Joan-Pèire èra tanben un òme engatjat en l’occitanisme, un escrivan bessai pas pron conoissut, un artista que venguèt mai d’un còup ai Rescòntres Occitans en Provença (La Mota dau Caire, Annòt….) sigue per un espectacle, sigue per la presentacion de films.
Après la sieu retirada, tres ans fa, avia creat lo C.E.P d’Oc que presenta sus lo malhum de videos que donan a audir l’occitan. Animava tanben d’estatges de montatges de films que d’unu sòcis de l’IEO-06 avian trevat, animava tanben de rescòntres dont auriam lo plasir de participar embé Miquèu de Carabatta.
Lo sabiavam malaut mas luchava còntra la malautia e s’arrapava a la vida.
Presentam au nom de l’IEO-06 li nòstri complanchas a la sieu frema e au sieu enfant.
Adieu Joan-Pèire, adieu Bachàs.
Lo 23 de junh dau 2012 Joan-Pèire BELMON avia convidat toi lu sieus amics a Molinet per la sieu darniera emission.
Répondre à l’article :
Marie Jeanne Verny : una granda tristessa : la partença d’un òme de granda cultura, e d’un òme d’accion tanben, un òme estacat al servici public, que se batèt sa vida tota per que nòstra lenga e nòstra cultura dintren dins lo servici public de l’audio-visual, un òme que saupèt transmetre e laissar la plaça a una jove, signe d’umilitat e d’intelligéncia, un òme que refusava lo sectarisme grafic e que trabalhava amb mistralencs coma amb occitanistas, pro que sian dubèrts, los uns e los autres, un òme que parlava una lenga rica, bèla, qu’escrivia de causas fòrtas, qu’una granda part dem|ora inedicha. Joan Pèire, tròp lèu nos as laissats… Mon espèr es que se contunhe ton òbra, que l’occitanisme contunhe ta dralha d’intelligéncia, de cultura, d’umanitat e que las estructuras qu’as mesas en òbra, coma lo CEPd’Oc, contunhen, malgrat la manca crudèla.
Marc Waltzer : encara una marrida jornada, adieu Joan Peire
Françon : Avii rescontrat Joan-Peire Belmon quora èra vengut a Casternòu per Vaqui en lo 2011.
M’en avisi de la sieu votz e mi semblava èstre un amic finda se non lo conoissii totplen.
Encara un que s’en va mas esperi que si va contunhar la sieu òbra;
Amistats.
Jan-Piè Aiperto : Cuèla fòtò ei ë di dë řa soa rëtiřada a Molinet, tuti ři sei amigui èřan li për řa dëreřa emission e aviavam fach fèta. Ř’èřa vënhut a Saorgë e ë m’avia ënvitat për pailàa-ři dë camin dë fèr, dë camin dë řa sàa… èřa un piajeë con eë d’animàa ř’emission dë VAQUI. Më n’avisëřai sempre. Adio Joan-Pèire.