Vaqui lo rendut-còmpte d’Andrieu FAURE de la Jornada « Pòrtas dubertas » a la Calandreta Gapiana que n’aviavam parlat lo 22 de febrier d’aquest’an.
Per legir l’article dau 22 de febrier : http://ieo06.free.fr/spip.php?article1102
Aquela jornaa « Pòrtas dubertas » de la Calandreta Gapiana fuguec un veritable succès.
Tota la còla dels parents e de la còla ensenhaira preparava aquò dempuei quasi dos meses : contactes ambé las adjuas mairalas e ambé las crúpias, mandadís d’informacion per los jornaus e las ràdios, afichas, …
Avian ben aliscat l’escòla en pintant las muralhas de la cort, en decorant totas las intraas, e en engimbrant un veritable comitat d’accuelh ambé una beguda e de crepeus, ….
Finalament fugueron 21 familhas que vengueron discutir ambé la regenta e los parents, e que prengueron un dorsier per inscriure lor enfant. Los pechons noveus fugueron leu dins l’ambiança e a faire coma si eran ja venguts a l’escòla dempuei longtemps. Chau solament sovetar qu’aquelos parent noveus fassin lo pas en marquant definitivament lor pechon à l’escòla.Una conselhera municipala, mandataa per lo conse, venguec veire coma se passava. Fuguec impressionaa per l’ambiança e partec ambé de recomandacions de faire a la municipalitat.
De membres dau Comitat de Sosten vengueron preu faire un torn e s’enaneron rassegurats per lo devenir de l’escòla.La tòca dels Amics de la Calandreta Gapiana es de durbir leu una segonda classa per poire, dins un an o dos, durbir un C.P. La velha, los pechons calandrons, eus, avian preparat lor classa descubert que deviá se debanar lo luns e lo març seguents. Sòrteron just un pechon moment per poire prendre una fotò d’avans despart.
Aquí-jonh l’article dau Daufinat Liberat dau 29 d’abrieu e la fotò correspondanta a l’article.
Andrieu FAURE
