Per si marcar a la fèsta dei 40 ans de l’IEO-06 :
https://framadate.org/4p3DMRuYeNbGDSqG
Cu èra Jòrgi GIBELIN ?
Jòrgi GIBELIN èra naissut en lo 1922 a La Palud de Verdon, d’un paire fustier-ebenista e d’una maire agricultritz.
Après de l’escòla elementària, anèt faire lu sieus estudis au licèu Gassendi de Dinha e venguèt escolan-magistre en lo 1941. Après lo BAC en lo 1943 siguèt mandat ai chantiers de joinessa de Nions. Per fin de pas anar en Alemanha per lo STO s’anèt escondre dins lo relarg de Riez dont l’i demorèt fins a la Liberacion.
Jòrgi GIBELIN participèt a la Resistança dau temps de guèrra per la realizacion, tra autres, de faus papiers.
Après de guèrra, faguèt un an de formacion a l’Escòla Normala de Niça e passèt una licença de filosofia en lo meme temps. Demorèt magistre, pi director d’escòla.
Si maridèt en lo 1945 embé Enriqueta magistra ela tanben e auguèron una filha e un enfant.
Jòrgi GIBELIN acabèt la sieu carriera d’ensenhaire en tant que director d’escòla en lo quartier Sant Glaudi de Grassa.
Interessat per la lenga (lu sieus parents parlavan provençau totai doi) intrèt au Felibritge pi a l’Institut d’Estudis Occitans dont creèt la seccion de l’IEO-06 lo 4 de novembre dau 1976 (J.O) e ne’n venguèt lo sieu premier president.
Jòrgi organizèt tanben en lo 1978 lu Rescòntres Occitans de Grassa. Una setmana d’estatge cada annada : cors de lenga, ataliers divèrs, conferenças… Participèt a la fondacion de la revista « Obradors Occitans », a la pàgina « Mesclum » dins lo jornal « La Marseillaise » embé Glaudi BARSOTTI. Publiquèt de còntes en occitans (coma aqueu de l’Esquiròu). Faguèt un travalh d’istorian sus Bellaud de la Bellaudièra, grassenc coma eu que siguèt publicat per la comuna de Grassa e lo Conselh General dau 06 (1988).
Après la sieu despartida en lo 1994 la nòstra seccion decidèt de si sonar « Seccion Jòrgi Gibelin » e de prepauar a la comuna de Grassa de donar lo sieu nom a la « MJC Altitude 500 » de Grassa, cen que siguèt acceptat.
Per ne’n saupre mai sus la vida e l’òbra de Jòrgi GIBELIN legir l’article de Claude BREGEON e Marie-Jeanne VERNY sus : http://vidas.occitanica.eu/items/show/2056