De cada costat dei Aups, lo genepi es una planta recercada per far de liquor. Aquesta planta creisse de maniera naturala sus l’arc aupenc tra 2 000 e 3 200 mètres d’autessa. Aparten a la familha dei compositae e au genre artemisia.
Lo genepi negre (artemisia spicata) es la varietat la mai recercada per aquelu que la cuelhon en França, en Itàlia ò pura en Soíssa. Aquesta varietat s’atròva alentorn de 3 000 mètres d’autessa.
Lo genepi blanc (artemisia umbelliformis) es una varietat adaptada a la curtura e que si pòu curtivar tra 1 400 e 2 000 mètres d’autessa.
Existon encara d’autri varietats de genepi coma lo genepi jaune (senecio incanus) ò lo genepi dei glaciers (artemisia glacialis) non adaptats la curtura.
La demanda en genepi es importanta. Laissar culhir aquesta planta sensa reglamentacion porria menar a la sieu disparicion d’aquí gaire. Lo fach de la poder curtivar presenta l’avantatge de pas plus tocar au pesquier natural.
Dau temps dei vacanças, auguèri l’astre de visitar emb’ai amics de l’Escòla Occitana d’Estiu (E.O.P) un camp plantat en genepi. Èra a Prapic (05) en cò de Jojo, un dei pioniers de l’estacion d’esquí d’Orcieras-Merleta.
Valada de Prapic (05) dont Jojo curtiva lo genepi
Valada de Prapic (05) dont Jojo curtiva lo genepi
Jojo nos presentèt li plantacions dau sieu genepi, lo sieu semenat dont fa créisser li novèli plantas. Per aüra es un pauc una experimentacion per eu : li granas son semenadi sigue a bodre (a la rambaiada) sigue en de pichins pòts de plàstica per èstre lests a produrre l’an d’après.
En lo semenat de Jojo
En lo semenat de Jojo
Jojo travalha lu sieus plantums sus sòl nud. Aquesta tecnica demanda de levar li « marridi » èrbas mai d’un còup en l’annada que lo genepi creisse plan-plan e que lu plantums si porrion faire estofar dai autri plantas. D’autri tecnicas esiston coma la messa en plaça d’un film plastic de poli-etilen.
Lu plants de genepi de Jojo
Lu plants de genepi de Jojo
Aquesta segonda tecnica, embé poli-etilen, presenta l’inconvenient d’una mai grana mortalitat dei plantas que pòu anar de doi a quatre còups mai, rapòrt a la mortalitat d’un sòl nud.
Plants de genepi mai clars après 3 ans de produccion
Plants de genepi mai clars après 3 ans de produccion
L’asard dei vacanças en li valadas occitani d’Itàlia mi faguèt rescontrar Giorgio. Es un amic d’enfança qu’aüra demora a Castelmanh, país dau fromai dau meme nom e dont curtiva de genepi. Li sieu plantacions s’atròvan a 1 800 mètres. Eu utiliza tant lo sòl nud coma lo nilon (nylon). Travalha embé « l’Associacion per la valorizacion dau genepi en lu Alps Occitans Pimontés ». Lo projèct a per objectius d’evaluar la possibilitat d’expansion de la curtura dau genepi, de definir li tecnicas curturali e de pòrger assistança tecnica ai curtivators de genepi.
La densitat teorica dei plantacions es de 17 plantas au mètres carrat per una produccion de 70 a 130 gramas de genepi au mètre carrat. Aquesti variacions de pes tenon còmpte de la mortalitat dei plantas (maladias diversi) segon lu ans e lo luec dont si curtiva.
Giorgio auguèt basta, l’an passat, una mejana de recorta de 70 gr/m2 de genepi sus nilon e 54 gr/m2 sus sòl nud.
Per planta, aquò rapresenta, un còup sec, un pes comprès tra 7 a 8 gramas de genepi.
Per lo liquor de genepi, Giorgio es en relacion emb’un negocian de Coni (Cuneo) que li crompa la sieu produccion tota.
Aquesti darnieri annadas lo prètz de venda èra tra 90 e 100 euròs lo quilograma sec. Cau èstre apassionat per faire aquest mestier, que per eu lo cau ben dire, es un complement a la venda dau fromai de Castelmanh que Giorgio fabrica en lo sieu « laboratòri » coma mi diguèt.
Denant de partir, Giorgio mi faguèt tastar un chícol de genepi au sieu ; un travalh pratic que m’en siáu sortit de maniera onorabla.
Partida de la produccion de genepi en cò de Giorgio
Partida de la produccion de genepi en cò de Giorgio
Per ne’n saupre mai :
– A tutto campo : Coltivazione del genepi in provincia di Cuneo per BARBERO Luca, FIORINA Pierguido (2006 ?) 16 pàginas.
– Domestication du genépi blanc par REY C., SLACANIN I. Revue suisse de Viticulture Arboriculture Horticulture Vol 29 (3) 1997 ;
