Lo mensual Aquò d’Aquí de setembre que venem de reçaupre rende omenatge a Maurís (PJ). Lu sieus amics l’an acompanhat per lo sieu darnier gran viatge au mitan dei galaxias lo 21 de julhet.
Coma per totplen devi a MAURÍS de m’aver fach conóisser la nòva cançon occitana dei annadas 1970. Lo rescontrèri en li MJC de Niça e dau País-Niçard, cantava la poesia d’Alan PELHON e lu tèxtos de Jan-Luc SAUVAIGO. Per ieu es estat una descuberta dei gròssi. En aquesta época, parlavi l’occitan dei valadas d’Itàlia e pas’ncara pron ben lo niçard. Intrèri en lo sieu univèrs musical sensa minga dificultat, content de veire que l’occitan-niçard avia quauqua ren da dire au monde dau sécolo XX. M’enavisi de la cançon « Santiago » dau Chili dont la sang avia gisclada, e d’autri cançons coma « Lu lops » ò « Marmitons » qu’èran cen que si pòu dire de cançons engatjadi. A costat d’aquò l’i èran de cançons d’amor, ben en la tradicion occitana : « Margarida », « Duerme emé ieu », « Lo passeron blu », eca…
MAURÍS èra un umanista, un trobador dei temps moderns, tot a l’encòp : cantaire, compositor e musician de qualitat. Es eu que mi donèt l’envuèia de viure drech en la dignitat retrovada de la nòstra lenga. Èra de toti li batestas despí la defença dei paisans de Var fins ai passa-carrieras de Carcassona e Besièrs.
Sòci de l’IEO-06, avia animat mai d’una serada a la MJC Bòn-Viatge : « Cadun es cantaire, cadun es cuntaire » pi participat ai « Rescòntres Inter-Culturaus Musicals de Bòn-Viatge a Niça ». Totjorn en la simplicitat, l’amistat, la convivialitat.
Malaut, vorguèt laissar un testimòni dau sieu travalh embé un CD doble qu’a per nom « Camin de vida ». Lu tèxtos dei cançons s’atròvan sus lo site de l’IEO-06 e vos doneràn una idea de la sieu òbra :
http://ieo06.free.fr/spip.php?article2090 e http://ieo06.free.fr/spip.php?article2091
Lo 21 de julhet MAURÍS es partit au mitan dei galaxias. Avèm perdut una votz maja, una votz fòrta e prigonda : aquela d’un amic. Capelada MAURÍS per lo tieu « camin de vida ».
http://aquodaqui.jimdo.com
Joan-Pèire
