Amics occitans, la cronica Ribon-Ribanha d’ancuei, titrada « A prepaus dau ronron dei cats. », v’es prepauada da Joan-Pèire BAQUIÉ president de l’IEO 06. Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc ! »
A prepaus dau ronron dei cats.
Quora vos en tornatz dau travalh, que cascalhatz lo saqueton dei porpetas e que caressatz lo vòstre cat, avètz drech a còup segur a de ronrons de contentessa.
Lo roncament dei cats es la marca de l’interés qu’aquesta bèstia vos pòrta, dei relacions qu’estabilisse embé una persona umana. Mas lo ronron dei cats, e aquò ven basta d’èstre descubert, a d’autri fonccions que fins aüra èri luenh de m’imaginar.
Lo sabiavatz que lu cats an poder de si ressanar, lo poder d’autogarison gaug au sieu roncament ?
Aí, de cercaires venon de descurbir que lo ronron dei cats contribuisse a aumentar lo nivèu de serotonina, a abaissar la frequença cardiaca e la pression arteriala. Aquò auria per consequença de regenerar li teisseduras animali e umani.
Si saup que lo ronron dei cats s’atròva tra 25 e 50 Hz de l’espectre auditiu. Aquesti frequenças bassi son conoissudi per accelerar la garison dei muscles e dei òs. Lu quinés son lu premiers a utilizar aquesti frequenças en electroterapia.
Pareisse que trenta minutas de ronron cada jorn doneria mai de serenitat au monde.
Avètz pas de cat ? Minga problèma. Vos podretz crompar lo CD « 30 minutas de ronron » e lo passar de lònga se lo vòstre espós s’entorna a maion embilat, se la jornada de vòstra esposa siguèt sobrecargada de travalh, se lo pichon s’es garolhat embé sa sòrre…
Avèm pas finit d’emparar dei bèstias, coma per exemple dei cans que detectan de malautias tau lo cancre ò lo diabète. D’autri bèstias senton venir un terramòto, un ciclòne, una erupcion volcanica ò autri catastròfas naturali coma lu tsunamis. Lu sieus sens totjorn en esvelh, senton li modificacions de l’environament : vibracion de l’ària, variacion de la pression atmosferica e ne’n passi.
Lo còup venent, quora auderetz lo ronron quiet d’un cat, cercatz de verificar l’efèct dau sieu roncament sus de la vòstra persona, istòria de verificar lu dires dei scientifics. Mi diretz pi !
Joan-Pèire BAQUIÉ (lo 27 d’aost dau 2013)