Lo 20 d’octòbre un quinzenau de sòcis de l’IEO-06 faguèron una sortida a Brelh.
Sigueriam reçauputs a la C.U.M.A (Coopérative d’Utilisation de Matériel Agricole) da Julian Marcuccini, Ives Maria, Joan-Maria Rosset qu’organizava lo desplaçament.
Après una presentacion de la CUMA, Julian Marcuccini nos parlèt dei problèmas divèrs qu’auguèron lu òuliviers a Brelh (Morfea…) e li solucions biologiqui que trovèron embé l’INRA e l’ajuda dei collegians de Brelh.
Pi Julien Marcuccini, nos faguèt una demonstracion per realizar la pasta d’òuliva. Cadun s’apressava dei machinas e susvelhava embé interés lo debanament dei operacions.
Un còup la pasta facha, cadun posquèt emplir un topin per tastar au sieu la pasta d’òulivas novèla.
Après un arrest a Nòstra Dòna dei Monts per manjar, aneriam a la conquista de la valada de la Malha (Maglia) dont sigueriam susprès de veire una crotz occitana sus un cason de tipe brelhasc.
Ives Maria, Tecnician de l’Ofici Nacional dei Bòscs, nos presentèt una familha Brelhenca e posqueriam escambiar cadun en lo sieu parlar.
Lo nòstre animator cant, Joan-Pèire Aiperto e lu sòcis presents cantèron en l’onor de la mestressa d’origina còrsa lo « Dio vi salvi Regina ».
Aremerciam toi aquelu que faguèron d’aquesta sortida una capitada. Siguèt una bèla fèsta de la lenga, de l’amistat e la convivialitat.
Reservatz ja sus lo vòstre agenda la data dau 10 de novembre, data de la novèla sortida de l’IEO-06.
