Dins l’encastre de FESTI’NOV, l’IEO-06 a prepauat un ATALIER D’ESCRITURA que si debanèt a la biblioteca municipala Sant Ròc, en partenariat embé lo ret de li bibliotecas de Niça.
La tòca èra de si faire rescontrar de monde costumier de la biblioteca e de gents de li associacions que fan viure la lenga.
Siguèt una capitada, la chifra dei inscrichs limitada siguèt sobrepassada, e deugueriam anar querre de cadieras de mai per installar tot aqueu monde dins la bèla sala de lectura de la biblioteca.
L’animator prepauèt doi juecs d’escritura, premier per si metre en gambas, calia si metre en cerca d’expressions corteti sus de papegats.
Pi lu participants si mandèron a l’aiga per escriure una istòria segon d’indicis que li siguèron donats. Cadun posquèt donar lectura de la sieu produccion, una bèla riquessa de tèxtes de toti li raças. Son presentats aquí sota quauqu tèxtes, aqueu de Crestian, de Claudeta e de Joan-Pèire.
En fin de sesilha, Joan-Pèire Spies faguèt lectura d’un extrach dau tèxte Desfolopament durable, de Viviane Nervo, pareissut dins lo libre Ribon-Ribanha, Crònicas d’ancuèi per deman.
Pi presentèt lu libres editats da l’associacion, e aremercièt lu participants.
Aremerciam fòrça lu responsables de la Vila e de la Biblioteca Municipala a Vocacion regionala de Niça dau sieu partenariat per organizar aquest eveniment, en particular
Sénher Pascal ALBERTINI, responsable de la programacion de la Bibliothca Louis NUCERA ;
Dòna Camille PERRONE, Responsabla de l’Action cultura, dei servicis au public e dei partenariats a la Direccion de li Bibliothcas,
Dòna Pascale ZUNINO, bibliotecairitz responsabla de la biblioteca Sant Ròc.
Crestian : L’autre matin ai perdut lo mieu pichin can en carriera Rosseti en vila vièlha. Esperi qu’a pas rescontrat lo chapacan, aqueu marrit baudo embé lo sieu gran arèt.
Lo can deu escapar ai autres cans fers, lo manja garri du Cors, per pas estre en perilh. Bessai s’escondrà en una cròta per la nuech e rauberà au matin un tòc de pastisson a un mainau.
Mas non mi fa tant de crùcis, perqué es equipat d’un GPS (Grata la Puça Sota ) e siáu segur que lo retroverai lèu.
Claudette : Una pichina istòria
Lo pichin Francés jugava à balon en la carriera que passa
davant la sieu maion.
Súbito, un garçon sòrte d’un immoble. Menaçant,
crida : “As pilhat lo mieu balon !”
-« Non ! Segur que NON ! Es lo mieu ! »
Lo garçon es balès, chapa lo balon, fuge, corre vito.
Francés non pòu lo veire : lo garçon s’esconde en l’entrada d’un immoble.
Francés es solet, abatut, descorajat…Camina tristament, regarda de tot caire… Mas ren ! Degun !
« Choa ! »
Es Madama Gentile que sòrte de maion ‘mé lo balon !
Lo balon OGCN que lu parents de Francés avian crompat per lo sieu anniversari.
Francés crida « MERCI ! »
Que gaug ! que bònur !
Novembre 2022
Joan-Pèire BAQUIÉ : Da pichon demoravi au camin de l’Aubre Sotran. Cada dijòus, que non l’i èra escòla, anavi a pen trovar ma maigrana que s’estaïa en lo quartier Sant Ròc, carriera de Sospèu.
Ma maire m’avia fidat una galeta per mi merendar a quatre oras. Eri fièr de l’i anar solet, sobretot qu’èra lo premier còup. Aquest camin, l’avii fach mai d’un viatge e lo conoissii da ment.
Tot en un còup, sensa que m’en avisèssi, un marrit canhàs s’avantèt per mi barrar lo passatge. Avii paur, mi sentii en dangier e cen que devia arribar, arribèt : lo can, qu’èra finòcho, sautèt sus lo paqueton que tenii en man e mi raubèt la galeta e lo saqueton dont mamà l’avia estremat.
Ieu m’anèri escondre en l’entrada d’un immòble per mi parar. Asperèri un brave moment sensa vos poder dire quant de temps l’i demorèri. Après d’un temps que mi pareissèt una eternitat, m’encalèri a metre pi un uelh fòra.
Ma maigrana si devia socitar. Mi faguèri coratge e anèri picar a la pòrta dau sieu. Maigrana, qu’avia totjorn quauqua ren en camin, mi regalèt de pasta de frucha, facha embé de codonhs de la Mota dau Caire (04).
Sus lo camin dau retorn, li cambas un pauc tremolanti, retrovèri lo saqueton vuèi e esgarat de ma maire. Auguèri paur de mi faire cridar.
Mas ma maire, coma de costuma, trovèt lu mòts per mi rassegurar e mi rendre lo soguinhe.
Lo 22 de novembre dau 2022 en la bibliotèca de Niça-Sant Ròc.
