Resson dei imatges dau Blagaire de l’IEO-06 Jan-Jaume de Niça ven de nen mandar la sieu 45ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Lei chtis e la coïna dau miegjorn
Bailejada per Crestian, promiera temptativa d’estagi de coïna niçarda, via Skype, per leis estatjants de Berck Plaja, emé au programme la pissaladiera !
Lei sòcis de l’IEO se carguèron dei crompas dei produchs dau canton (en Niça vielha, sus lo cors per lei cebas e leis olivas, au molin de blad de Santa Barba per la farina, en aqueu de Blosac per l’òli, leis amploias encò de Mèstre Ò e de son mandadís adamont.
Per qu’aquest assai sieguèsse una capitada, un molon de conselhs fugèt mandat ais escolans fòrestiers, sustot per totei lei precaucions d’a prendre per lo vèstit e lo materiau (1).
Toteis aquelei lusents conselhs fuguèron escrupulosament seguits, e meme mai que mai.
Per regraciar e meme onarar leis organisators niçards, totei leis estagiaris, coma aquela dameta, auborèron lo casco dei soudaires dei chantiers Monti ( per s’aparar dei marrits efècts dei cebas ais uelhs dei paures sensa soleu ) e la camisa roja, mòdel Bèpe l’argentin.
Avètz aquí la pròva que son fòrça amables aquestes gents dei país d’oil (2) !
1 : lo còp venent i mandaràn tanben nòstre Òcpinèu emé sa viròla de securitat
2 : e nos vaquí un còp mai davans una question tant filosofica que fondamentala : estent que lo mòt « oil » se troba èstre l’anagrama dau mòt « òli », coma se pòu faire que lei gents dei país d’oil son a cosinar emé de bure e que nosautrei, lei gens d’òc, lo fasem emé d’òli … vaquí un rude obratge que, de segur, se farà pas sensa bonhetas …
JJ de Niça