Lu proverbis fan partida dau patrimòmi niçard e son l’ànima dau pòble que li a creats. Ja en lo 1878, G.B. TOSELLI avia augut consciènça d’aquò e avia fach un « recuei de « 3,176 prouverbi nissart » qu’es estat mai estampat en lo 1973 da Laffitte Reprints (Marselha). Mai pròch de nautres Jan BLAQUIERA a radunat « 636 Prouverbi e sentensa dòu païs nissart » en un libret tot escrich a man. Cadun dins lo sieu canton, en la sieu familha, conoisse encara de proverbis esconoissuts dai autres. Vos prepausam de nen mandar lu vòstres proverbis que seràn mes sus lo vòstre site. Per començar vos prepauam quauqu proverbis sus lo vin reculhits pròche Felicia e d’autres mai numerós radunats da Josette escolana dau cors de niçard de la Calandreta de Drap.
Proverbis de Félicie :
– « A cu non plas lo vin, que Dieu li leve l’aiga ! »
– « La bota non dona que lo vin que a. »
– « Cu après la polenta beu d’aiga, aussa la camba, la polenta s’escapa. »
Proverbis de Josette :
– « Aqueu que vòu fa morir sa molher, li fa pilhar lo soleu de febrier. »
– « Quora lo cuòu es frust, lo Pater Noster es just. »
– « Se febrier ven coma un moton, se’n va coma un lion. »
– « Vin vielh, òli nòu e frema jova. »
– « O per fiera, ò per frema non si deu anar a l’Escarena. »
– Per pichin que sigue lo moron, si destruge la maion.
– Filha d’auberge e figuiera sus lo camin, se non son tocadi de matin son tocadi de sera.
– A la candeliera lo soleu es per valon e per valiera
– A la candeliera grand gèl e grand geliera.
– Après un aquistaire ven un acabaire .
– Lo ciel fa pan, se non plòu ancuei plòu deman.
– La luna fa ròdol, ò vent ò bròdo.
– Calenas au fuec, Pasca au juec .
– Lo jorn de l’an lu jorns creisson d’un pas de can.
– Febrier passa coma un can lebrier.
– Se febrier ven coma un moton se’n va coma un lion.
– Abriu es de trenta, plòuguèsse trent’un faria mau en degun e plòuguèsse trenta doi faria ben en toi.
– Setembre mete lo calen a pendre.
Quora lo vin es dins la tina, l’òli es dins l’òuliva.