Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, l’i a mai de setze ans, lo 8 de junh de 1997. Òsca !
Cronica per aqueu dissabta 01 de març dau 2014
en lenga nòsta
Per l’Agachaire
Promier de març
Lo promier de març ei benlèu un dei jorns de l’annada onte i auriá lo mai de causas a dire…
Alevat ben entendut lo promier de l’an, mai justament lo promier de març o fuguet eu lòngtemps. Nòste calendier d’ara i festeja d’abòrd sant Aubin, lo revolucionari ne’n fai lo Primidí 11 de Ventòse, jorn que consacra au Narcís (se sòna pereu corbadòna, mai ieu li ai jamai entendut dire autrament que « flor de mai »).
Es pereu la jornada mondiala de la Proteccion civila (emai, pareis, aquela dau Compliment…) e, entre autres anniversaris, aqueu dau desbarcament de Napoleon en Provença, que marca lo promier de sei Cent Jorns.
Podriam dire tanben aicí que lo promier jorn d’aqueu mes, que li diam pereu nautrei lo Mes dei Fòus, es encara au mitan dei Jorns de la Vièlha : mai tot aquò demandariá de lòngs comentaris… E perqué pas citar un des coblets que marquèron un temps lo començament dei mes dins l’Armanac provençau ? Se cantavon sus l’èr de « E ieu quand la veirai » : « Siáu l’aspre mes de març : / Pas pus tard, / Fau començar de mòure / Rebrondar l’olivier / Davans plòure, / E podar lei plantié ! / Podem ! / Fosem / Fumem ! / Cotreiem ! Cavem ! »
Mai m’aviso ara qu’ai plus la plaça de parlar un pauc mai d’un solet d’aquelei subjects marcencs, e encar mens de lei despintar en detalh… Serà bensai per un autre an !
Jean-Yves ROYER
