Bòna annada 2017
Cars amics e sòcis,
L’Institut d’Estudis Occitans-06 vos desira una pròpi bòna annada 2017. Que l’an novèu sigue portaire d’avançadas per la lenga d’Òc, lo respècte e la promocion dei lengas, la diversitat culturala dins un esperit de convivéncia aquí e dapertot.
Dins una baraca dau mercat en lo jardin Albert Ier de Niça, decembre dau 2016
La cèrca de la diversitat dins la ciutat demanda a caduna e cadun d’èstre present, en lo sieu relarg, per portar la sieu pèira au clapier, per mostrar la vivacitat de la nòstra associacion, per que l’occitan viugue e tengue la sieu plaça dins lo grand concèrt planetari.
Vos desiram segon la tradicion una bòna annada 2017, ben granada e ben acompanhada.
2016 siguèt una annada plena per la nòstra seccion embé la fèsta dei 40 ans de l’IEO-06 que siguèt un temps fòrt de l’annada !
Fèsta dei 40 ans de l’IEO-06 sala Laure Ecard
Vos esperam encara mai numerós en lo 2017 a legir lu nòstres articles e a participar ai activitats de l’IEO-06 e aqueli dei associacions afrairadi (qu’arepresentan mai de 2 000 sòcis).
2016, dins la vida vidanta, es encara 7 cors de lenga, 3 ataliers de danças tradicionali, 2 de teatre, de charaïssa, l’escòla dei campaniers de Saorge, la cronica setmaniera « ribon-ribanha », la biblioteca-cedeteca a Niça, tres pàginas facebook que recampan 964 amics, la crònica setmaniera de l’Agachaire, eca…Per la terça annada un atalier de coïna foncciona embé Crestian DESRUMEAUX, li caminadas embé lo nòstre sòci e amic Joan-Maria ROSSET, lo partenariat embé lo PNR Préalpes d’Azur, d’activitars de promocions de la lenga en partenariat embé d’autri associacions : la dictada occitana, lo balalire, eca… siam presents dins d’escòlas de Niça per d’animacions en lenga…
Atalier coïna embé Crestian DESRUMEAUX
L’IEO-06 publiquèt un libre novèu en lo 2016 :
Ribon-Ribanha LO RETORN òbra collectiva dei sòcis de l’IEO-06
L’an 2017 serà una annada per anar de l’avant mé de projècts ambiciós coma aqueu que meneriam per la peça de teatre « En Camin… », devèm saupre federar e metre en valors lu nòstres ataliers e li competanças de cadun.
Avèm besonh de toi e v’aperam toi a l’Acampada Generala dau 21 de genoièr despí li 9 oras 1/2, (Maion dau Terraire Camin d’Úpie) en Bergier per ne’n discutre.
De pòstes au Consèu d’Administracion (C.A) son a provedir. Asperam li vòstri candidaturas pròche lo vòstre animator, per corriel, per corrier.
Fèsta embé courir à Peillon
AG en Bergier
L’AG es un moment-clau en la vida d’una associacion, e si devem de toi l’i participar.
Après l’AG beurem ensems lo gòto de l’amistat e mangerem ensems li especialitats qu’auretz aduchi.
L’après-dinnar, l’IEO-06 desirèt organizar un balèti. Si debanerà en lo meme luec, a 15 oras, animat da lu Barbalucos .
Es dubèrt a toi, a gratis, per li sòcias e lu sòcis de l’associacion, coma amics, parents, vesins, que volètz convidar a un moment de fèsta.
Atalier danças
Brefle un moment de convivialitat e de rescòntres emb’ai sòcis venguts de Còntes, La Còla, Grassa, Drap, Niça, Saorge, e ne’n passi…
Atalier danças la Ternitat
Un autre apontament / rendètz-vos es previst lo 28 de genoier a 10 oras embé la dictada occitana au Licèu MASSENA organizada per un collectiu d’associacions (L’Association des Professeurs de Langues Régionales (A.P.L.R.), la Fédération des Associations du comté de Nice, l’Institut d’Études Occitanes (I.E.O.-06), Nice la Belle, Nissart per tougiou, Parlen ! Oc-bi countea.
Vos asperam encara mai numerós que l’an passat (150 ).
Mèfi ! Aquest an si cau marcar, sus la pàgina :
https://framadate.org/s6Qq8eRmH8VdC69R
que, per de rasons de securitat que cadun conóisse, lo provisor demanda ai organizators la tiera dei participants
Coma lo podetz veire l’annada 2017 comença fòrt.
Avèm mantuns projècts, lu porrem realizar basta se siam numerós !
Fètz-nos lo plasir d’èstre au nòstre costat.
Comptam sus la vòstra participacion e lo vòstre investiment. Vos demandam tanben de pensar a faire societar d’amics que pensan que defendre la lenga d’òc e la sieu cultura es aparar la diversitat en lo monde.