CAMINADA DAU TOET DE L’ ESCAREA
Dimenegue 19 de febrier dau 2017, 18 sòcis e amics de l’IEO-06 caminèron en la valada dau Redebraus per finir au vilatge dau Toet.
Lo soleu èra de la partida. Cau dire que Joan-Maria l’avia comandat per fin d’aver de caminaires urós e non pas ronhós !!!
De matin aneriam a la Balma dei Pagans veire l’ostau troglodic bastit en una bauma a cinc mètres sobre lo nivèu de la tèrra. Segon lu scientifics aquest ostau dateria de la fin de l’Atge-Mejan e servèt de proteccion còntre lu envasors (Mòros, Turcs, Francés a l’época de la Revolucion Francea e dei Barbets), una autra explicacion porria venir dei guèrras de religions au moment que lu protestants cercavan a s’escondre en li montanhas nòstri. La bauma s’atròva gaire luenh de la comuna vesina de Sospèu que siguèt a un moment donat un centre dei reformistas. Ancuei encara lu scientifics cercan a resòuvre la question sobretot qu’una pichina capèla en roïna s’atròva gaire luenh de la Balma dei Pagans
Edmond Mari, scientific local e cònsol de Casternòu-Vilavièlha (06), provèt de tornarbastir lo luec dins un dessenh que vos presentam çai sota
Pi aneriam veire despí lo camin la bèla cascada a Sant Laurenç dau Toët auta de mai de 40 mètres.
Torneriam en veituras au Toët faire una pichina caminada de 40 minutas, facila tot au lòng dau riu Redebraus.
Aquí mangeriam tranquiles (mas a l’ombra) lo past sortit de la biassa e passeriam un bòn moment a costat d’una bèla lòna. L’aiga èra a 10 grados e degun vorguèt pilhar un banh, pas manco Joan-Maria que l’aiga meme frèia non li fa paur.
A 2 oras e mieja si recamperiam au vilatge.
D’unu qu’avian d’obligacions si recampèron au sieu e d’autres vorguèron encara veire una bèla lòna conoissuda da Joan-Maria per fin de l’i tornar d’estiu.
A 5 oras dau ‘près-dinnar visiteriam emb’un elegit de la comuna lo vilatge.
Aremerciam toi aquelu que si son entrevats d’organizar la sortida e en particular Joan-Maria.
Crédit photos : Régine, JPB, Quaramelle.