Resson dei imatges dau Blagaire de l’IEO-06 Jan-Jaume de Niça ven de nen mandar la sieu 6ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
La Reina dei Glaç
Estagi de subrevida, dins lei condicions dau ceucle polar Antartic, dau femelam dau GIGN ?
Espinchada meticulosa dei servicis de l’inspeccion dei fraudas e de la qualitat cercant lei 0,1 dau cent dei micròbis e autrei virús escapats au novèu Javel Lacrotz dobla accion ?
Per l’enquista de la revista dei consomators « 60 milions de cogordas », lectura d’etiquetas, in situs, a la cerca dau terrible E120 dins la grata roja, lo famós refrescament niçard coneigut dau monde entier ?
Lo congelator estent encalat, escapada a la lèsta dei cacalaus gigants de Comòdo ?
A la seguida de la dictada de l’IEO, assai de tractament per crioterapia dau bolhiment dei budèus de la tèsta de la reina de la competicion ?
Lo marrit Gargamèl, dins un episòdi inedit dau darnier Peyo : « Agrigèu e lei Chtronfs » ?
La masca Rada escondent sa tarta de pomas empoisonadas, alestida per empachar Albert, lo prince dei monegascs, per lei milas annadas venentas, de tornar potonar la radassanta mercanta de blanca e de nèu ; blanca, nèu vengudas deis illas sensa passar la doana ?
Espaventada estruci negra fugida dau pargue zoologic dau Cap Ferrat confondent gibre e sabla per s’escondre en cò de Picard ?
Bòna presa per la marescauciá. Misé Curabiaça, sensa vergonha, agantada a la trapa ?
Non ! Non, ren de tot aquò. Lo simple entraïnament d’una postulanta a l’engajatment dins la tras que famosa chorma internacionala de dançaires sus glaç : « òli de ton Ais » !
JJ de Niça