A.G de l’INSTITUT D’ESTUDIS OCCITANS PROVENÇA-AUPS-CÒSTA D’AZUR
Coma cada annada l’Acampada Generala de la Seccion IEO Provença-Aups-Còsta d’Azur es un moment fòrt en la vida de l’associacion au nivèu regionau. Cada sòci, a jorn de l’escotisson l’i pòu participar e s’exprímer sus li orientacions e lo devenir de la seccion regionala. Vos demandam de reservar tre ara aquesta data importanta e de venir numerós a l’A.G lo dissabte 12 de decembre de 2009.
L’i a uech jorns, eriam entre lei barris de Carcassona… imatge inoblidable per una jornada pas coma leis autrei… una d’aquelei que marcan dins una vida…e segur que pron de temps encara, ressonarà dins nòstrei còrs, aquesta crida «Anem Òc! per la lenga occitana!», facha sieuna per mai de 20 000 personas que, un còp per totei, decidiguèron ambé nautrei, d’aver rason !!!
Capitada ufanosa dau passacarriera… cuberta mediatica (regionala e nacionala) importanta, encara qu’imperfacha de segur (pron d’asenadas de dichas) mai un gròs enantiment, qué…
Mai d’un d’entre nautrei, l’i auràn pescat una energia novèla per s’acarar ambé vòlha e estrambòrd au nòstre contèxte provençau especific que rende l’accion de proximitat tant sovent malaisada…
Mai avèm la pròva, un còp de mai, que siam pas solets… que la mobilizacion es totjorn aquí… (mielhs encara, contunha de créisser !) …
e que nòstra dralha es la bòna…
Vaquí çò que se deurem rementar dins lei moments de galèra ! que l’accion contunha mai que jamai (e lei pretzfachs mancan pas !)
Mai testards que testards, lei farem plegar !
Toteis ensems i arribarem !
Tota aquesta darriera annada laissèri pron sovent de caire l’IEO Provença-Aups-Còsta d’Azur per m’ocupar de Anem Òc… e se de còps n’aguèri un pauc un sentiment de culpabilitat, cresi que lo resultat dau 24 d’octòbre l’escafa completament…
Ara, la batèsta contunha, e per faire lo ponch e endralhar la seguida de nòstra accion e de nòstreis activitats, se recamparem :
lo dissabte 12 de decembre per l’AG de l’IEO Provença-Aups-Còsta d’Azur
Mercé de reservar aquesta data !
Dau mai serem, dau mai serà granda nòstra eficacitat …
