Lo darnier acamp de burèu alargat au C.A. si debanèt en una sala au Centre dei Cèdres a Moans lo 29 de novembre dau 2008 partent de 2 oras 30 de l’après-dinnar.
Acamp de Moans lo 29 de novembre dau 2009
Ordre dau jorn :
– bilanç dau viatge a Montsegur
– venguda de Sano Naoko a Niça lo dimarç lo 9 de decembre.
– preparacion de l’AG dau 2009
– manifestacion de Carcassona
– questions diversi
Acamp de Moans lo 29 de novembre dau 2009 (2)
L’acamp si debanèt dins un ambient fruchós e amistadós.
– bilanç dau viatge a Montsegur
Lo viatge a Montsegur siguèt per nautres una capitada, l’ocasion de rescontrar e d’escambiar emb’ai “chaminaires” venguts a pens dei valadas occitani d’Itàlia, de se’n puar fins au Castèu, luec mitic de toi lu occitanistas, de rescontrar de monde de l’IEO-Aude, l’IEO-Arieja, de descurbir tot un país. Siguèt finda l’ocasion per d’unu d’escriure, de faire un rendut-còmpte en lenga dau viatge, de metre sus lo malhum de fòtos e mai d’un article, de recevre esquasi un centenau de messatges, d’organizar una serada diapositivas, eca…
– venguda de Sano Naoko a Niça lo dimarç lo 9 de decembre.
50 personas an ja reservat per la venguda de Sano Naoko, professora d’Universitat au Japon, que farà per lu sòcis e amics de l’IEO-06 una conferença en occitan : “Cal faire la fèsta.” Siam lèsts per ben aculhir la nòstra conferenciera nipona. Toi lu sòcis e amics presents seràn convidats a menar una especialitat niçarda/provençala per l’après conferença e lo gòto de l’amistat que seguerà.
L’AG de l’IEO-06 si debanerà aquest an a Grassa lo dissabta 17 de genoièr dau 2009. Toi lu sòcis de l’IEO-06 e li associacions afrairadi son asperats per aquest moment fòrt de la vida de la nòstra associacion. Cada sòci recevrà una convidacion per mai de detalhs.
– manifestacion de Carcassona
Se l’Article 75-1 de la Constitucion ditz :”Li lengas regionali apartenon au patrimòni de França.” (21 de julhet dau 2008) e mai sigue ja important, podem pas s’acontentar d’una grueia vueia. Volem per lo 2009 una “lei quadre” per li lengas de França e per l’occitan en particular. Ja vos podem anonçar que serem presents a Carcassona lo 24 d’octòbre e que n’aprofitarem per faire la descuberta d’una ciutat autra encara da definir lo diménegue/dimenge 25 d’octòbre.
Per ne’n saupre mai sus cen que si diguèt dissabta, contactatz un dei membres dau C.A. present que si farà un plasir de vos contar dins lo detalh lo nòstre acamp.
