Totplen de monde a L’A.G de l’IEO-06 que si debanèt en la sala quadrants solari de la comuna de Coarasa. Aquest an una novèla formula siguèt presentada : A.G. de matin, aperitiu e past pilhat ensems pi espectacle e balèti embé l’associacion coarasiera dei “Cadrans Solaires” que nos faguèt l’onor de balar embé nautres. Per aquelu que posquèron pas l’i si trovar vos presentam lo rapòrt d’activitats e lo rapòrt moral que siguèron presentats per lo president sortent e votats a l’unanimitat levat una abstencion. Li eleccions dau Burèu novèu si debaneràn a l’acamp venent. La data e lo luec son pas’ncara fixats, seràn mandats d’aquí gaire ai membres dau C.A.
I – Rapòrt d’activitats de l’annada 2010 presentat per Joan-Pèire BAQUIÉ, President sortent a l’Acampada Generala dau 15 de genoier dau 2011 a Coarasa.
Cars amics e sòcis,
Vòli aremerciar de’n premier la comuna de Coarasa e la sieu cònsola dòna Mònica GIRAUT-LAZZARI de la sieu presença e per lo prèst d’aquesta bèla sala dei Quadrants Solari per la tenguda de la nòstra A.G.
Aremercii tanben, Anna-Maria POGGIO, viça presidenta de l’IEO-Federal que faguèt lo desplaçament per la nòstra A.G. e toi aquelu que si son desplaçats per l’A.G. qu’es un moment fòrt de la vida d’una associacion.
V’auguri segon la tradicion « una bòna annada ben granada e ben acompanhada », per vautres e li vòstri familhas. Vequí lo rapòrt d’activitats per l’annada 2010.
De seneca a drecha : S. Maurici CASCIANI (clavaire), D. Carlòta RUBINI (segretairitz), D. Mònica GIRAUT-LAZZARI (cònsola de Coarasa), Joan-Pèire BAQUIE (President), D. Anna-Maria POGGIO (Viça-Presidenta de l’IEO-Federal)
AG 2011 a Coarasa
1° Li jornadas « Descuberta dau País » :
– Lo 13 de junh, avèm participat a la caminada « Caminem per òc » de l’Engarvin fins a Ròcasparviera. Eravam mai de 30 : la tòca, faire marcar la lenga d’òc au patrimòni mondial de l’umanitat. Aremerciam Marc WALTZER qu’a alestit aquesta jornada, mes en plaça li placas de fusta embé Joan DIGANI e tanben Ricard LAZZARI que faguèt faire li placas tant bèli.
Remessa dau diplòma-sovenir de la jornada
La chorma dei caminaires.
Per l’annada 2011 avèm lo projèct de doi caminadas per la lenga d’òc : una a Drap e l’autra au Molinet.
2° Lu ataliers de la seccion :
– Lu cors de lenga setmaniers, Son 5, recampan sempre totplen de monde 100 personas (93 en lo 209, 88 en lo 2008, 75 en 2007, 90 personas en 2006, 73 en 2005, 65 personas en 2004).
Per memòria citerai lo cors de Sant Jaume (20 escolans marcats) aqueu de la Còla (20 escolans marcats), lu 2 de Niça (38 escolans marcats), lo cors de Drap (22 escolans). Una capelada ai professors : Anna-Maria SGARAVIZZI-GARCIA, Frederic MARTRON, Andrieu SAISSI, Joan-Pèire SPIES, Joan-Pèire BAQUIE ; vodrii saludar lu escolans grassencs e aquelu dau segond nivèu de lenga de Niça que si pilhan en carga quora lo professor de lenga non pòu èstre present.
La demanda es importanta, auriam da besonh d’autres ensenhaires. Un es a si formar, vòli parlar de Marc WALTZER dins l’encastre dau « Volontariat per l’occitan ». Siam en cerca d’un luec per l’aculhir a la rentrada de setembre.
Lu sòcis presents a l’A.G de Coarasa.
– Lu ataliers de danças populari d’òc recampan a Grassa cada 15 jorns toi lu afogats dei baletis (25-30 personas) sota la direccion de Choaseta GANDOLPHE e Maria Crestina BRAVET d’una part e Maria-Jousèp CARRERE e Joan-Pèire CHIAPELLO de l’autra, en alternança.
Aqueu de Niça recampa 22-25 personas marcadi, cada 15 jorns tanben (èra un còup cada tres setmanas a l’Agora Nica-Est l’an passat). N’aprofiti per remerciar Choaseta GENTI l’animatritz per lo sieu travalh e lo sieu investiment que pòrta de frucha aquesta annada embé mai de monde.
Per la quinta annada, a Niça un atalier de teatre bailejat da Joan-Pèire SPIES foncciona, recampa 10-12 personas. L’atalier si debana un còup cada tres setmanas. Per lo darnier cors de l’an 2010 nos an organizat un espectacle de qualitat. Siáu totplen content que de joves collegians li fan miranda, coma Juliette e Fabien.
L’atalier teatre dau Gramon a Coarasa
Lo 4 de mai avèm aculhit a Niça la tropa de Barba Zon embé Irena Marino, Glaudo Bellucci (sòci de l’ieo-06) e Becho Laura, l’autor de la peça : Veuva Rompeta. (50 personas)
Juliette e Fabien a l’A.G.
L’atalier de cant : foncciona per la terça annada, si debana cada 3 setmanas a Niça embé Joan-Pèire AIPERTO. (15 personas marcadi). Lo còro a cantat tanben per lo nòstre plasir en decembre. Lo travalh complit en gaire de temps per Joan-Pèire e lu sòcis es remirable. Avèm lo projèct d’anar cantar a Mons dins Var lo 21 de mai per la « Targa dei Cantaires »
L’atalier bibliotèca. Es Carlòta Rubini que s’entreva d’aquò cada diluns presta de libres ò de CD ai sòcis que lo desiran. A fach la tiera de toi lu libres e CD a disposicion dei sòcis de l’ieo-06. Un pauc mens de monde l’i a participat aquesta annada.
Lo bilingüismo en Bergier. Una commission de 5 sòcis s’es creada per metre lo nom dei carrieras en Provençau sus la comuna de’n Bergier (Le Rouret). Avèm lo sosten dau sieu cònsol e dau consèu municipal. La commission s’es ja acampada 7 còups e avèm ja pron ben avançat.
Devem rendre lo vòstre travalh après dei vacanças de febrier. Rescontreriam la premiera ajoncha au cònsol de Valbona Sofia-Antipolis, dòna TOULEMONDE a la sieu demanda per faire tanben un travalh de toponimia sus d’aquesta comuna.
Acamp embé M. Gérald LOMBARDO cònsol d’en Bergier (Le Rouret)
LO GRAMON cèucle locau de l’IEO-06 a Niça :
Coma lo sabètz, LO GRAMON cèucle locau de l’IEO-06 participa tanben a l’organizacion d’un festenau inter-curturau despí 15 ans a l’Agora Nice-Est. Aquesta annada avèm aculhit lo 13 de març lo Còr de la Plana e Fairy Muse (Musica irlandesa), pi lo 20 de novembre Mauris e lu sieus amics per « Camin de Vida » embé un grope de berbers « Ayour » (la luna).
Aficha 15en R.I.M
3° L’ensenhament
Per nautres es un sector clau.
Siam sempre deçauputs per la politica de l’Estat rapòrt a l’ensenhament de l’occitan. Per 33 departiments dau domani occitan, la chifra dei pòstes au CAPES d’Occitan-Lenga d’Oc es de 4, coma l’an passat.
L’acamp au Rectorat sus li lengas regionali, que l’IEO-06 l’i èra convidat, s’es debanat lo 20 de genoier. L’ieo-06 demandèt tra autre la dubertura d’una escòla bilinga en lo 06 e un pòste de Conselhier Lenga e Cultura Regionali. Avèm escrich 2 letras a l’I.A en aqueu sens lo 2 de febrier e lo 15 de decembre. Avèm minga respòsta per lo moment.
Françon DALBERA e Joan-Pèire SPIES dion que dins lo primari l’i son d’ensenhaires qu’organizan de rescòntres tra classas dont s’ensenha la lenga per d’escambis. Parier s’es organizat sus la circonscripcion dei Valadas d’en Palhon una conferença pedagogica sus l’ensenhament dau niçard. Se saludam aquesti iniciativas, aregretam que l’oferta en lenga non sigue mai institucionalizada e demòre basta la volontat de quauqui magistres.
Siam sensa nòvas de la Calandreta de Niça, que comunica pas sus la sieu situacion.
Mapa dei cors adults d’occitan : L’ieo-06 a realizat tres ans fa, una mapa dei cors de lenga sus l’ensems de l’espaci occitan. Repilha lo document papier “Aprenem l’occitan ! L’occitan, je m’y mets !” Li son 250 cors sus d’aquesta mapa que s’atròva sus « Google Maps ». La mapa dona lo luec precís dau cors, lo nom de l’animator, lo jorn, l’ora, lo nom de l’associacion organizatritz, lo camin per li anar. Mai de 27 000 personas l’an ja visitada (23000 l’an passat, 16 000 doi ans fa).
Dictada occitana : L’IEO-06 organiza, per la quarta annada, lo 29 de genoier dau 2010 a Niça la dictada occitana que si debanerà en 45 vilas de l’espaci occitan e de Catalunha. Li tres premieri annadas, Loïsa SGARAVIZZI-NAVELLO professor de lenga, Miquèu PALLANCA, professor d’occitan-Lenga d’òc e Steve BETTI, conselhier dau rector per li lengas regionali liejèron la dictada tracha d’un tèxto sieu. Li associacions afrairadi de l’Escomessa e dau CCOc-País Nissart, l’organizeràn lo meme jorn a Canas e a Niça. Vos demandam de participar numerós en aquesta dictada que si debana sempre en l’amistat e la convivialitat. Aquest an serà Jan-Luc GAG professor d’occitan-lenga d’òc e òme de teatre que vendra legir la dictada e lo cantaire Jan-Nové MABELLY qu’animerà l’après-dinnar.
Dictada occitana dau 2010
Li conferenças :
– Lo 2 de febrier Loïsa SGARAVIZZI-NAVELLO faguèt una conferença sus lo vocabulari dau vin e de la vinha.
Loïsa SGARAVIZZI-NAVELLO
– Lo 30 de novembre, dins lo quadre dei Charaïssas, Miquèu PALLANCA, professor d’occitan-Lenga d’òc, venguèt nen parlar de la sieu novèla estudiada en cors « Augustina ».
– Lo 18 de genoier, Patrici ARNAUDO, professor d’occitan-Lenga d’òc, vendrà nen parlar de la sieu experiença radiofonica en lenga sus France Bleu-Azur. (veire l’article : http://ieo06.free.fr/spip.php?article2007)
4° La creacion :
Per la terça annada Anna-Maria MILARDI baileja la cronica « Ribon-Ribanha » (fonciona despí lo 2 de novembre dau 2008 ribonribanha@yahoo.fr). Avèm publicat esquasi un centenau tèxtos inedits prepauats per mai de 30 escritors diferents. Mandam una chamada a toi lu escritors amators per l’alimentar qu’avèm pas plus de tèxtos en reserva.
Despí 3 ans Joan-Ives ROYER nen manda la sieu cronica setmaniera de l’agachaire en aupenc. Es una cronica que passa cada dissabta sus lo jornau « La provence » e tanben sus lo nòstre site ieo-06 lo meme jorn.
La difusion de la produccion occitana :
Coma cada annada es lo festenau de Moans-Sartòu au mes d’octòbre que dona l’ocasion la mai grana d’escambiar emb’au monde que visita lo nòstre estand, de si faire conóisser e de vendre la nòstra produccion. Rapòrt a l’an passat avèm un pauc mai vendut. Merceji toi aquelu, numerós e volontós, qu’an tengut l’estand au festenau de Moans. La venguda de l’escrivana Magali BIZOT-DARGENT au festenau dau libre, la sieu intervista en lenga e la sieu presença a l’estand nos faguèt vendre mai de 30 libres sieus. Avèm vendut tanben de libres a destinacion de la joinessa e aquò nos ralegra. Aremerciam Enric BONÉ que s’entreva de la gestion e de l’estòc dei libres.
Magali BIZOT-DARGENT a l’estand de l’IEO-06 : fòto Marc Waltzer
Magali BIZOT-DARGENT au festenau dau libre de Moans-Sartòu.
La comunicacion :
Per la terça annada, l’IEO-06 a publicat un desplegant per faire conóisser li sieu activitats ai particulars e associacions. Es una ajuda precioa l’avèm aremarcat sus l’imatge de marca de la nòstra associacion pròche lo public e lu elegits.
Au principi d’aquest an participèri en dirèct a una emission (de 30 minutas) sus radiò-Lengadoc.com (dont presentèri l’IEO-06, per dire cu siam e cen que volem), siguèri tanben intervistat per France Bleu-Azur e Radiò Pays per telefòno qu’es una radiò associativa dei comunautats Alsaciana, Bretona, Basca, Catalana, Còrsa, Flamenca e Occitana en Ísola de França.
5° La vida de la seccion :
Eravam 214 en lo 2010 (199 sòcis en lo 2009 (167 sòcis en lo 2007 e 2008 164 en 2006, 124 en 2005). La chifra aumenta cada an. Començant d’èstre conoissuts tant au nivèu local coma nacional (IEO-Federal).
Lo burèu s’es acampat 4 còps a Niça, Bergier e a Grassa de maniera regulara en mai de l’AG de l’IEO lo 16/01/10, lo 13/02, lo 26/04, lo 28/11. Devi mercejar lu membres dau burèu per la sieu ajuda. E participarem a l’A.G. dau CREO-Provença, lo 27 de febrier.
6° Li nòstri relacions emb’ai associacions amigui :
La sinergia tra associacions a encara ben foncionat aquest’an, Alp Harmonia, l’Escomessa, lo CCOc-País-Nissart, Sota l’Òrme, la SAHM, Cantar lo País a l’escòla, Bolega-Bolega, … Signali que metèm en rega, sus la telaranha tot cen que tòca a la vida e activitats dei associacions afrairadi.
Avèm ajudat fananciarament la publicacion dau CD d’ « Occitaniss’ en balèti » e co-organizat embé Bolega-Bolega un rescòntre tra joves musicians.
CD dau Grope Occitaniss’
Avèm co-organizat lo 31/07 e lo 1ier/08 un rescòntre « Terinhon en fèsta » en li valadas d’Itàlia au mes de julhet cotria embé l’associacion dei sonaires de campanas dau 06 e la Cevitou. Lo nòstre sòci Joan-Pèire AIPERTO l’i participèt e la nòstra segretairitz Carlòta RUBINI rapresentèt l’IEO-06 per lu doi jorns a Sant Pèire (val Varaita) e Sent Pie (Val Grana)
Siam passats de 492 articles escrichs en 2005, a 784 en 2006, 1048 en 2007, 1408 en lo 2008, 1800 en lo 2009, 2000 en lo 2010. Siam liejuts dins lo monde entier (mai de 280 000 visitas).
Mai de 2855 messatges son estats mandats per d’internautes sus lu foroms ò en respòstas a d’articles mes en rega.
Devi aremerciar Anna-Maria MILARDI per la sieu ajuda, a ja mes en rega mai de 166 articles. Mandèri una chamada sus lo site (article 2000) per fin que quauqu’un vengue n’ajudar.
Aquelu que recevon pas’ncara lu articles de l’ieo-06 sus la telaranha si porràn marcar per fin que li mandessiam tota l’actualitat occitana, practicament un article cada jorn.
8° Li relacions emb’au monde politic
De mai en mai siam pilhat au seriós per lu politics, quau que sigue lo nivèu : comunau, despartementau, regionau, nacionau. Se si refudam a faire de politica politiciana, siam una associacion curturala, avèm lo dever de faire avançar li idèas curturali de l’IEO. Avèm escrich ai 9 deputats dau despartiment per fin qu’una lei quadre sigue votada per li lengas de França.
Avèm tanben escrich ai candidats dei eleccions regionali (dau 8 au 13/02) per conoisser lo sieu projèct rapòrt a la lenga e cultura occitani.
9° Lu projècts
– La sinhaletica bilinga en Bergier (Le Rouret) : lo projèct a ben avançat. Una còla de 5-6 personas s’es acampada de maniera regulara. Coma dich devem presentar un diaporama public a la comuna. Avèm lo projèct de persegre lo travalh de toponimia sus d’autri comunas (Rocafòrt e Valbona Sofia-Antipolís tra autre)
– Persegre l’animacion de vespradas per de cantaires, contaires, gents de teatre… (coma la venguda dau cantaire Daniel Daumas lo dimarç 19/01/2010 a Niça e lo 20/01 a Grassa, aquela de Jan-Nové MABELLY lo 15 de decembre) Si pensam tanben de faire venir lo teatre de Barba ZON.
Lu espectators grassencs e colencs
Jan-Nové MABELLY a Grassa
– Avèm ajudat la comuna de Coarasa a revirar lo sieu site oficiau en lenga e continuam de lo faire en fonccion de la demanda per d’articles novèus. Tanben reviram d’articles per lo jornal municipal de Coarasa « So Portal ».
– L’organizacion en lo 2011 de doi caminadas per ajudar a faire marcar la lenga d’òc au patrimòni mondial de l’umanitat. La tòca es de mediatizar aquesti caminadas que si faràn dapertot sus l’espaci occitan. De faire firmar lo mai possible d’elegits que s’atròvan sus lo percors.
– Esperam tanben d’estampar un an de cronicas « Ribon-Ribanha », en foncion dei nòstri finanças e de subvencions. La còla serà acampada d’aqui gaire per causir lu tèxtos.
– La creacion d’una banca de donadas fotografiqui. Aquesta banca de donadas fotografiqui porria servir ai IEO de la region. Avèm da besonh aquí, d’una persona, interessada per la fotografia e que porria faire de dorsiers tematics au servici dei sites IEO e perque pas de jornaus coma Aquò d’Aquí ò La Setmana. Anna-Maria MILARDI a ja començat lo travalh mas auria da besonh d’ajuda.
– Lo sostèn coma l’an passat au cors de Grassa embé per exemple l’organizacion de conferenças e espectacles coma si fan a Niça.
– La dubertura d’un 6en cors de lenga dins lo quadre dau « Volontariat per l’occitan »
– Lo projèct d’un viatge de fin d’annada per anar au rescòntre dei sòcis dei autri IEO de la region.
Lo past de miegjorn a Coarasa
II – Rapòrt Morau
Coma venètz de l’audir dins lo rapòrt d’activitats, l’annada 2010 foguèt ricA d’eveniments, per lo nòstre travalh, li nòstri recèrcas, li nòstri creacions leterari, li nòstri activitats…
Avèm marcat de ponchs pròche lu elegits, que sigon de drecha coma de seneca, travalham embé toi lu democratas. La nòstra soleta politica es aquela de la lenga.
Lo site de l’ieo-06 que contunha d’espantegar li idèas de l’ieo-06 en aquò nòstre e dins lo monde 2000 articles en 74 mes).
L’an 2011 serà l’annada de l’espandiment, si devèm de creísser, lo farem embé judici, emb’ai nòstri possibilitats, lo concors de toti li bòni volontats. Avèm da besonh tra autre d’ensenhaires, d’un tecnician per lo site.
D’unu an ja fach lo pas, aquest an, siatz estats encara mai numerós a pilhar de responsabilitats e a vos engatjar dins la vida de l’associacion. Lu membres dau CA e dau burèu si son desplaçats de maniera regulara ai acamps. Vos remercii d’aquò e vos convidi a faire parier en lo 2011.
A l’ieo-06 avèm da besonh de toi. Cadun li deu trovar la sieu plaça. Demandam a cada sòci de ne’n trovar un novèu e lo faire societar. Es una caua simpla mas que porria participar a l’espandiment de la nòstra associacion. D’unu l’an ja fach.
Lu burèu s’acampa un còup cada doi mes, mas es pas un burèu barrat, basta ne’n faire la demanda e seretz lu benvenguts ai nòstri acamps.
Vodrii aprofitar d’aquest apontament per vos dire que l’axo premier de la nòstra politica curturala per 2010 serà coma l’an passat la trasmission de la lenga e la curtura nòstri :
– Trasmission ben segur emb’ai cors, lu ataliers de danças dont la lenga deurà èstre mai presenta, dins lu ataliers de charaïssa e de teatre, de cant a Niça.
– Trasmission per lo site de l’ieo-06. Podètz mandar ai vòstres amics (-gas) ò collègas lu liames dei articles pareissuts sus lo site que vos an interessats. Es un pichin travalh per cadun mas que pòu menar de monde curiós a la lenga.
– Trasmission ai generacions novèli. Per exemple embé la lectura en familha de libres en lenga ai vòstri pichoi ò felens.
– Trasmission per lu cants que sigon tradicionaus ò de creacion.
– Trasmission per la creacion d’una escòla bilinga.
– Trasmission en lo quadre dau « Volontariat per l’occitan » mes en plaça per l’IEO-federal.
– Trasmission per lo label « Oc per l’Occitan » » mes en plaça tanben per l’IEO-federal, pròche li comunas e li empresas.
Li son mai d’una maniera de trasmetre la lenga e de metre en avant la nòstra occitanitat.
La lenga, aquelu que la sabon, la devon emplegar. Se ne’n devon servir.
Valorizar la diversitat dau monde comença embé la lenga d’òc : lo niçard, lo provençau, l’aupenc per nautres.
En Espanha (Catalonha) e en Itàlia la nòstra lenga a un vertadier estatut. Es reconoissuda coma cò-lenga nacionala, a l’IEO travalham per la sieu reconoissença en cò nòstre, avèm ja capitat de faire metre l’article 75-1 dins la constitucion. Mas aquò basta pas. Demandam una lei quadre. Si devem de sostenir lu deputats que depausèron una proposicion de lei relativa au desfolopament dei lengas e curturas regionali ( mai de 50) e escriure a toi lu deputats per lu sensibilizar ai lengas de França e votar la lei. Avèm vist li dificultats qu’avèm embé l’afaire de Vilòva de Magalona (34), per faire metre basta un panèu en lenga a l’entrada d’una vila.
Lo nòstre moviment curturau pilha d’envam, de fòrça despí Besièrs e Carcassona 1 e 2. Lo 24 d’octòbre dau 2009 eravam 25 000 a manifestar embé « Anem òc ».
Per acabar dirai que toti li demandas exprimadi per l’IEO dins lo domani de l’ensenhament, la creacion, lu mèdias e la vida publica an per tòca de crear un contèxto favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani.
La nòstra accion a per amira la preservacion de la diversitat culturala e lingüistica e demanda lo respècte dei drechs de la lenga occitana.
Vos demandi de votar per aquest rapòrt d’activitats e aquest rapòrt morau.
