Cara amiga, car amic de l’ieo-06.
Lo 13 de novembre dau 2004 l’ieo-06, a dubert un site per dialogar emb’au monde, per parlar dei nòstres projècts, per vos faire conoísser li nòstri activitats, per èstre mai pròche dei sòcis e pegar un pauc mai a l’actualitat.
Ancuei nen siam a l’article 200. Pensaviam pas escriure tant e tant escambiar emb’au monde en gaire de temps.
Avèm vorgut escriure d’articles diferents que tòcan a tota la curtura occitana : ensenhament, receta de coïna, cançons, actualitat (teatre, conferenças, cinemà, libres…), mas finda l’actualitat que tòca a la lei d’orientacion per l’escòla e lu marrits còups que son fachs a l’occitan e ai autri lengas de França, ai ensenhaires capecians, professors d’escòla e ne’n passi…
Ensems fem camin e si sentem sostenguts dins li nòstri orientacions de “política” curturala.
N’avètz escrich mai de 250 messatges per escambiar en lenga ò en francés. Mas siatz mai numerós a venir visitar lo site.
Despí qu’avèm mes XiTi, es a dire despi 18 jorns sabem qu’avem augut 626 visitas e qu’avètz liejut 2319 pàginas.
Cen que sabiavam pas es qu’avèm de visitors dau monde entier : Espanha (15 visitas), Belgica (13), Estats-Units (9), Australia (6), Maròc (6), Itàlia (5) Emirats Arabo Units (4), Mexico (4), Pero (4), Confederacion Elvética (3) Polònha (3), Suèda (3) Brasil (2) Canadà (2), Colombia (2) Alemanha (2), Portugal (2) Tailanda (2) e finda l’Argentina, l’Austria, lo Chili, l’Argeria, Ong-Quòng, la Croacia, lo Paraguai, la Russia, lo Reiaume-Unit,l’Uruguai, lo Venezuela, lo Tògo, …
Nos faria plasir tanben qu’aqueu monde si fague un pauc mai conoísser, que laissèsse un messatge en bas d’article ò dins lu foroms dau site. Aquí la chamada es mandada.
Cercam tanben de redactors, s’aquò vos agrada d’escriure en lenga ò en francés podetz sempre vos faire conoísser e nen prepauar lu vòstres textos.
Autra caua, podetz finda n’ajudar se venetz sòci de l’ieo-06 : au mai serem numerós au mai aurem de pes pròche lu elegits per desfendre la lenga e la curtura nòstra.
Amistats niçardi en toi