Un vintenau de sòcis a respondut a la chamada de Joan-Maria Rosset e Françon Dalbera per una caminada que a menat lo monde en li roïnas dau vilatge vielh e autorn dau Mont Macaron.
De matin Edmond Mari, lo cònsol de Casternòu-Vila Vielha nen faguèt lo comentari sus li flors e li plantas rescontradi per camin : l’èrba dau lach (euphorbe), qu’aquela espinoa es protejada sus tot lo territòri de la comuna ; la missuga (ciste) emb’ai sieus pels sota li fuelhas que semblan de coton e recuelhon l’aigai de la nuech ; la flor dau coguòu (bouillon blanc) planta medicinala que sierve quora un toisse, eca…
Françon a, dau sieu costat, parlat de l’istòria dau vilatge, dei luecs d’implantacion dau temps de la patz romana, pi dau temps dei invasions lombardi e sarrasini sus li cimas e fin finala lo retorn pus bas dont s’atròva lo vilatge actual.
Après dau past de miegjorn, lo monde s’es endraiat per faire lo giro dau mont Macaron e visitar una ferma au Vilar.
De retorn au vilatge avèm encara poscut visitar la glèia consacrada a Maria qu’a donat l’escainom dau monde de Casternòu : Lu madonencs.
Li caminadas de l’IEO-06 si van arrestar lo temps de l’estiu. Vos tornerem trovar a la rentrada de setembre per d’autri visitas dau pais, per d’autres rescòntres e per d’autri caminadas.
Un libret « Sentier de découverte du Mont-Macaron » editat per la comuna de Casternòu-Vilavielha s’atròva a la bibliotèca de l’IEO-06 a Niça. Lo tenem a la vòstra disposicion.
