Dins gaire mai de tres mes, lo 24 d’octòbre de 2015 se retrobarem totei a Montpelhier per ramentar sei promessas a nòstrei decidaires… per li ramentar
– que siam totjorn aquí, mai que jamai convinçuts de la dignitat de nòstra lenga e de la legitimitat de nòstra revendicacion,
– que volèm una lèi que li done un vertadier estatut juridic e garantisse de mejans propicis a son desvolopament.
Alora, mai que jamai, vèn a nautrei de demostrar que la demanda es totjorn aquí, de mai en mai fòrta ambé lo temps que passa.
Devèm faire montar la pression…
Dins aquesta optica, rendem vesibles totei lei sostens an aquest eveniment :
1 – lo sosten associatiu,
2 – lo sosten financier, una urgéncia ! (partent de 5€)
3 – d’autra part retrobem-se ensems per escambiar a l’entorn de l’actualizacion de la CRIDA (veire çai-sota lei rendetz-vos prepausats)
4 – Quauquei nòvas mai.
1 – Lo sosten associatiu :
La Coordinacion “Per la lenga occitana”, convida l’ensems dau movement associatiu (occitanista ò non), a transmetre e a sostenir son accion e sei revendicacions.
Ja d’uneis associacions an declarat son sosten ; de veire : http://www.anem-oc.org/sostiens-soutiens/
Vòstra associacion voguèsse sostenir la manifestacion, que lei grandei linhas revendicativas ne’n son donadas dins la “Crida” (e que serà completada dins lo corrent de l’estiu dau temps dei diversei rescòntres ambé lo movement culturau associatiu), respondetz an aqueste messatge sus : contact@anem-oc.org) en precisant ben :
•lo nom de l’associacion ;
•vòstra qualitat (president, secretaire/a, eca…) ;
•e en jonhant lo logo au format jpeg (que serà ajustat a dicha dei sostens sus lo site de la manifestacion).
2 – Lo sosten financier : Una urgéncia per posquer perseguir l’organizacion materiala e concreta de l’eveniment !
Doas possibilitats per aqueste finançament participatiu (realisable a comptar de 5€ !) :
– sigue directament sus ULULE : http://fr.ulule.com/manifestacion-anem/
– sigue, per aquelei que reguinhan un pauc per utilizar Internet per pagar, una autra possibilitat : mandar un chèc (a l’òrdre de l’IEO) a IEO, 11 rue Malcosinat, 31000 Toulouse, amb un messatge sus papier liure marcat de son nom e de la mencion : Sosten Manif/ULULE.
Avisatz-vos que la data limita per la recepcion dei chècs es lo 25 de julhet,
que Ulule s’arrèsta en linha lo 30 de julhet !
3 – Forums d’escambis per desvolopar l’actualizacion de la CRIDA.
La manifestacion del 24 d’octobre se farà coma en 2012 dins l’encastre d’una jornada amb las autras lengas oprimidas de nòstre país.
Mas portarà tanben un messatge reivindicatiu particulièr per la lenga e la cultura occitana, es la CRIDA.
Aquesta CRIDA es organizada en 4 capítols :
Ensenhament,
Cultura,
Socializacion de la lenga,
Mèdias.
La CRIDA concernís l’ensem del movement occitan e la devèm de segur actualizar a la situacion d’ara. Lo contèxte de la manifestacion serà ongan pro diferent del darrièr còp amb d’eleccions regionalas per de regions bravament modificadas al nivèl occitan. De mai avèm agut d’eveniments dempuèi 3 ans, coma la darrièra reforma del collègi, que son pas sens consequéncias per nòstra lenga.
Per actualizar la CRIDA prepausam al mond de participar a 4 Forums d’escambis, un per capítol.
Aquestes Forums son dobèrts a totas las bonas volontats que sián individualas, associativas, mas tanben de sindicats, d’elegits, de partits politics o de collectivitats.
Las acampadas dels Forums se debanaràn :
– a l’ESTIVADA, a Rodés, (CCOR, – Ostal del Patrimòni – Plaça Foch), per la Cultura
Divendres 24/07 – 10h
– a l’E.O.E., a Vilanòva d’Òlt, (EOE, – Licèu professional l’Ostal, carrièra Paul Sabatier), per l’Ensenhament, ( Avís per dinnar o sopar sus plaça, contactar eoe@wanadoo.frabans lo 31 de julhet !)
Dimècres 19/08 – 14h
– a Narbona, (Ostal occitan, carrièra Joan Jaurès (sota l’Ofici dau torisme), per la Socializacion,
Divendres 18/09 – 18H30
– a Tolosa, (Ostal d’Occitània, 11 car. Malcosinat), per las Medias,
Divendres 11/09 – 18h
Prepausam tanben al mond de mandar de contribucions sul site de la coordinacion :
www.anem-oc.org
4 – Quauquei nòvas forra-borra :
● Lo 24 d’octòbre manifestaràn tanben (mai d’infos : http://www.anem-oc.org/bl%C3%B2g/) :
– Lei Bretons, a Carhaix,
– Lei Bascos, a Bayonne,
– Lei Còrses luòc encara indeterminat, (Ajaccio coma en 2012 ?)
– Lei Catalans mandaràn una delegacion à Montpellier.
● D’unei bus son ja anonciats, dins una letra venenta vos donarem mai d’entressenhas practics per se ramblar e rejónher lo luòc de recampament.
Oblidetz pas de nos mandar vòstreis informacions que leis apondrem sus lo site dins la tiera : (http://www.anem-oc.org/i-anar-y-aller/)
● Per aquelei que vendràn a Rodés, i trobaretz afichas e CRIDAs.
Anem ! Òc ! Per la lenga occitana !
A lèu, coralament,
La Coordinacion