Resson dei imatges dau Blagaire de l’IEO-06 Jan-Jaume de Niça ven de nen mandar la sieu segonda crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
De breakfast en breakseat
Coma se podriá entendre aquelei gens d’Albion, qu’an oblidat Alienòr, sa reina d’a passat temps ; que barrutlan totjorn dau marrit costat dau camin ; que t’an esquichat lo balon de fotbal per que doas chormas de 13 ò 15 marrits gusas posquesson l’agantar emé lei mans ; que t’an cremat de piusèlas en plaça de catars ; que te fan de pès e de mans per mesurar sei longors ; que nos vireran la florida tonèla en tunèu negre de fum ; que t’an tancat son Greenwich au bèu mitan de son país per faire petar, totei lei miegjorns, sus lo Castèu, lo canon e reglar ansin lo relotge de Santa Reparata ; que la mapa de çò que li dison “City” es pas pariera que la mapa de “Niça Vièlha” ; que s’entaulejan, per merèndar, sus lo cuòu d’una Ford en plaça dei bancs dau Pilha-Leva ò, emé de collègas, sus lo ribàs de l’oliveta ; que, de longa, te podan aitant de princes e de princessas que nosautres de taxas e lèis novèlas ; que, per lo mendre eveniment, te sòrton una vielhariá, de ben avans la darniera guèrra, que cambia de capèu a cada fotò, dau temps que lei nòstrei polalhieras an totjorn pas pagat son promier ; que, quora t’agantan lo fuec au cuòu, te fan petar son termometre a ben mai de 100 gras ; que, meme quora, de còp que i a, parton de Wagram, te fan totjorn arrestar lei trins encò de Trafalgar ; que, tre lo mes de janvier, venon se refrescar a la fònt de Nimes qu’emé lo solet vin dei costieras ; que t’an fach un chaple emé lei nòstres bèlei tres colors per faire son drapèu ; que t’an estatufiat un manchet bòrni en plaça de Pepin en camisa roja ; que lei cacalaus, te li fan córrer, en competicion, sensa lei manjar ; que t’an fach la choisida de nomar sei batèus que fan l’anar-venir sus La Marga, dau meme que la barcassa tubejanta dau pòrt vièlh de Marselha en plaça dau polit passatgin dau Límpia ; que fan de musica emé de pèiras rodelantas e d’insèctes estranis en plaça dei nòstres galòias vèspas, sei bachàs, fifres e petadors e que, totei leis après-dinnars s’enchocan fèr emé de fuelhas secas de darjeeling que pòu estre que reiau dau temps qu’avèm una montanha de farigola 1851 a partegar …
Maugrat d’intens esfòrçs jornadiers tant nombrós que sincers, maire se sabiatz, leis entendre lo pòdi gaire, leis entendre lo pòdi pas …
JJ de Niça