Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, l’i a mai de quinze ans, lo 8 de junh de 1997. Òsca !
Chronique pour ce samedi 01 juin 2013
en lenga nòsta
Per l’Agachaire
Promier de junh
Podètz regardar vòste cartabèu, un armanac, lo jornau, la television, cercar sus lo Net, escotar la ràdio, demandar a vòste entorn : tot aquò vos dirà que siam encuei au mes de junh !
Pasmens, vau bensai pas tròp lo còp de pausar la question a un termomètre, ò a la meteorologia nacionala, que siáu pas segur que ne’n seràn tròp d’acòrdi…
Quand penso au provèrbi de ma grand que, après aguer dich « en abriu, te leves pas un fieu » e, prudenta, apondut « en mai gaire mai », afortissiá a la fin : « en junh, demandes consèu en degun » !…
Qué direm puei aquest an dins aqueu mes ? « En junh, lo freg es pron comun » ? E après aquò : « En julhet, le printemps es tardier » ? E perqué pas, tant que l’i siam : «En avost, tapètz-vos » ?
E lo pièger ei de se dire qu’aquò es una consequéncia dau rescaufament de la planèta, qu’aqueste mete lo pati dins lei sasons ! Que se rescaufe encar un pauc, e avèm pas fenit de se gelar les alibòfis jusqu’en temps de meissons… Mai benlèu qu’alora susarem per Novè e qu’en febrier banharem la camiá…
Jean-Yves ROYER
