Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups.
Per informacion, aquesta cronica comencèt, l’i a mai de dètz-e-sèt ans, lo 8 de junh de 1997. Òsca !
Cronica per aqueu dimènegue 23 de novembre dau 2014 en lenga nòsta
Per l’Agachaire
Un 23 de novembre
Eriam a Sant-Gèli en 1190, e aqueste jorn d’aquí naissiá son promier dròlle en cò dei Folco, une familla borgesa de la vila. Li diguèron Guiu e deguet pron profiechar, au mens quand fuguet grand, d’abòrd que li diguèron puei « lo Gròs »…
Venguet un avocat renomat, se maridet, aguet d’enfants, ce que l’empachet pas, un còp veuse, de venir capelan de Sant-Gèli, puei avesque dau Puei, e encara archevesque de Narbona… S’arrestet pas aquí, que fuguet en 1264 elegit coma papa ! Prenguet alora lo nom de Clement IV, bensai perqué èra naissut lo jorn de la Sant-Clement.
Mai maugrat son nom, clement o es pas estat de rèsta… Son òbra maja en politica fuguet son ajuda a Carle d’Anjó, còmte de Provença e de Forcauquier (au pus grand malur des populacions), per metre (dins lo sang) la man sus lo reiaume dei Doas-Sicílias, après n’aguer fach assassinar l’eiretier legitime. En Provença, a Pèrna-lei-Fònts, una pintura de la torre Ferranda mòstra lo papa en trin de l’investir coma rèi.
Son òbra pontificala ela, a encar mai de que faire refernir. Autoriset de torturar les erètges, de castigar (jusqu’à la mòrt !) lei Jusieus tornats a sa religion, demandet a Loïs IX de terrorisar lei blastemaires, e au rèi d’Aragon Jaume Ier de cochar lei maumetans de ses tèrras…
Bota, en 1190, lo 23 de novembre èra estat un ben marrit jorn…
Jean-Yves ROYER
